तुतारी एक्स्प्रेसमधून बालकाला पळविणाऱ्यास ठाण्यात पकडले

तुतारी एक्स्प्रेसमधून अपहरण झालेल्या बालकाची सुटका
ठाण्यात आरोपीला अटक
सकाळ वृत्तसेवा
ठाणे, ता. १७ : मुंबईतील केईएम रुग्णालयातून दोन वर्षांच्या बालकाचे अपहरण करून तुतारी एक्स्प्रेसने पळून जाणाऱ्या एका व्यक्तीला ठाणे लोहमार्ग पोलिसांनी बुधवारी (ता. १७) रात्री पावणेएकच्या सुमारास अटक केली आहे. आरोपीचे नाव अमोल अनंत उदलकर (वय ४२, रा. सिंधुदुर्ग) आहे.
तुतारी एक्स्प्रेसच्या एस-२ डब्यात एक संशयित व्यक्ती लहान मुलासोबत प्रवास करीत असल्याची माहिती मुंबई लोहमार्ग पोलिसांना मिळाली होती. या माहितीनुसार, ठाणे रेल्वे स्थानकात गाडी येताच लोहमार्ग पोलिसांनी तत्काळ कारवाई करीत अमोल उदलकर याला ताब्यात घेतले आणि त्याच्या तावडीतून बालकाची सुटका केली.
चौकशीत हे बालक केईएम रुग्णालयातून पळवून नेल्याचे आणि भोईवाडा पोलिस ठाण्यात याबाबत गुन्हा दाखल असल्याचे उघड झाले. वैद्यकीय तपासणीनंतर बालकाला डोंबिवली येथील जननी आशीष चॅरिटेबल ट्रस्टमध्ये ठेवण्यात आले आहे. ठाणे लोहमार्ग पोलिसांनी आरोपी अमोल उदलकरला पुढील कारवाईसाठी मुंबईतील भोईवाडा पोलिसांच्या ताब्यात दिले आहे.