संजय राऊत यांना घरात घुसून मारू : राजेश मोरे

संजय राऊत यांना घरात घुसून मारू
कल्याण ग्रामीणचे आमदार राजेश मोरे यांची धमकी
सकाळ वृत्तसेवा
डोंबिवली, ता. १९ : ठाकरे गटाचे नेते आणि खासदार संजय राऊत यांनी धर्मवीर आनंद दिघे यांच्याविषयी केलेल्या एका विधानामुळे मोठा वाद निर्माण झाला आहे. या वादाच्या पार्श्वभूमीवर शिंदे गटाचे कल्याण ग्रामीणचे आमदार राजेश मोरे यांनी ‘संजय राऊत यांना घरात घुसून मारू,’ अशी जाहीर धमकी दिली आहे.
याप्रकरणी डोंबिवलीतील इंदिरा गांधी चौकात शिंदे गटाने आमदार मोरे यांच्या नेतृत्वाखाली आज ‘जोडे मारो’ आंदोलन केले. या वेळी ज्येष्ठ शिवसैनिक सदानंद थरवळ यांसह इतर शिवसैनिक मोठ्या संख्येने उपस्थित होते. या वेळी बोलताना मोरे यांनी राऊत यांच्यावर जोरदार टीका केली. ते म्हणाले, ‘संजय राऊत यांना शिवसैनिक घरात घुसून मारल्याशिवाय शांत बसणार नाहीत.’ राऊत यांनी आनंद दिघे यांच्याबाबत केलेल्या कथित चुकीच्या वक्तव्याबद्दल त्यांनी तीव्र निषेध व्यक्त केला. राजेश मोरे यांनी संजय राऊत यांचा एकेरी उल्लेख करत, ‘राऊत यांनी राहुल गांधी आणि शरद पवार यांच्याकडून सुपारी घेतल्याचा’ आरोपही केला आहे.
या आंदोलनादरम्यान शिवसैनिकांनी संजय राऊत यांना चर्चेसाठी खुले आव्हान दिले आहे. ‘संजय राऊत यांनी चर्चेचा विषय घ्यावा, डिबेट ठेवावे, आम्ही शिवसैनिक येतो,’ असे आंदोलक म्हणाले.

वाद काय?
राऊत यांनी ‘आनंद दिघे नेते, उपनेते नव्हते, ते जिल्हाप्रमुख होते, बाळासाहेबांच्या बाजूला त्यांचा फोटो का,’ असा सवाल उपस्थित केल्यानंतर या वादाला सुरुवात झाली आहे. या विधानामुळे राजकीय वर्तुळात मोठी खळबळ उडाली असून, शिंदे गट आणि ठाकरे गट यांच्यातील संघर्ष आणखी वाढल्याचे दिसून येत आहे.