नागरिकांनी दिला चोरट्याला चोप

नवी मुंबई, ता. २० (वार्ताहर) : खारघरच्या शिल्प चौकाजवळ कारची काच फोडून पाच लाखांची रक्कम चोरण्याच्या प्रयत्न नागरिकांच्या सतर्कतेमुळे फसला आहे. या प्रकरणात खारघर पोलिसांनी अजय भोगेकरला अटक केली आहे.
कामोठे येथे राहणारे बांधकाम व्यावसायिक प्रकाश चोपडा (४०) सोमवारी (ता. १५) सायंकाळी खारघर येथे गेले होते. या वेळी कामगारांना पगार देण्यासाठी त्यांनी पाच लाख रुपयांची रोख रक्कम ठेवली होती. खारघरच्या शिल्प चौकात कार उभी करून पदपथावर पाणीपुरी खाताना अजय भोगेकरने कारची काच फोडून रोख रक्कम असलेली पिशवी घेऊन पळण्याचा प्रयत्न केला. हा प्रकार लक्षात आल्यानंतर चोपडा यांनी पाठलाग करून काही अंतरावर नागरिकांच्या मदतीने चोराला पकडले. या वेळी जमावाने अजयला मारहाण केली. तसेच चोरलेल्या पाच लाखांच्या रकमेसह आरोपीला अटक केली.