जि.प.शाळा बोंडेखळच्या विद्यार्थ्यांनी घेतले वागळे (ठाणे) येथील गणरायाचे दर्शन!

बोंडेखळच्या विद्यार्थ्यांनी घेतले वागळेमधील गणरायाचे दर्शन
मुरबाड, ता. २० (वार्ताहर) ः आदिवासी भागातील जिल्हा परिषद शाळा बोंडेखळ येथील विद्यार्थ्यांना जय बजरंग बाल मित्र मंडळ ठाणे येथील प्रसिद्ध गणरायाच्या दर्शनाची संधी शाळेचे मुख्याध्यापक विलास गवाळे व दरिया कासिमसाब शेख यांनी उपलब्ध करून दिली. यावेळी सहशिक्षक दरिया कासिमसाब शेख यांनी सर्व विद्यार्थ्यांना गणेशोत्सवाचे सामाजिक, सांस्कृतिक आणि धार्मिक महत्व समजावून सांगितले. गणरायाच्या मूर्तीचे सौंदर्य, भव्यता व मंडळाने दिलेले साहित्य पाहून चिमुकल्यांच्या चेहऱ्यावर आनंद ओसंडून वाहत होता. गणपती बाप्पा मोरयाच्या घोषणा देत चिमुकले भारावून गेले. या उपक्रमामुळे विद्यार्थ्यांमध्ये भक्तीभाव तर वाढलाच, त्याचबरोबर शहरातील इमारती रस्ते, वाहतूक या सर्व बाबींचा अनुभव घेतला. वागळेच्या गणरायाचे दर्शन घेण्यासाठी दादा ताई फाउंडेशन, जय बजरंग बाल मित्र मंडळ किसन नगर-३ वागळे आणि शाळा व्यवस्थापन समिती व पालकांचे मोलाचे सहकार्य लाभले.