"कसाऱ्याचे पाणी "पुस्तकाचे प्रकाशन

कसाऱ्याचे पाणी पुस्तकाचे प्रकाशन
किन्हवली, ता. २० (बातमीदार) ः ठाकरे गटाचे ठाणे ग्रामीण उपजिल्हा प्रमुख शंकर खाडे यांच्या कसाऱ्याचे पाणी या आत्मचरित्र पुस्तकाचे प्रकाशन शुक्रवारी (ता. १९) मातोश्रीवर पक्ष प्रमुख उद्धव ठाकरे यांच्या हस्ते करण्यात आले.
महाराष्ट्रात १९ जून १९६६ ला शिवसेनेची स्थापने वेळी शिवसेनाप्रमुख बाळासाहेब ठाकरेंच्या भाषणाने प्रभावित झालेल्या शहापूरातील शंकर खाडे यांनी पहिली शाखा शहापूर येथे १९६८ ला व ६ जून १९७४ साली कसारा या ठिकाणी शाखा सुरु केली होती. त्यावेळी तत्कालीन खासदार सतीश प्रधान व जिल्हा प्रमुख आनंद दिघे यांनी या शाखांचे उद्‍घाटन केले होते. मुंबईहून नाशिककडे जाताना बाळासाहेब ठाकरे यांनी अनेकदा कसाऱ्याच्या या शाखेला भेटी देऊन शंकर खाडे यांचे कौतुक केले होते. खाडे यांनी आपल्या बालपणापासून ते राजकीय, शैक्षणिक प्रवासाचा, शहापूर तालुक्यात शिवसेना संघटन वाढीसाठी केलेल्या घडामोडींचा या पुस्तकात मागोवा घेतला आहे.
मुंबई येथील मातोश्रीवर पुस्तक प्रकाशनाप्रसंगी शिवसेना सचिव विनायक राऊत, ज्योती ठाकरे, ठाणे जिल्हाप्रमुख कुंदन पाटील, जिल्हा सचिव काशिनाथ तिवरे, तालुकाप्रमुख कुलदीप धानके, जिल्हा परिषद सदस्या रेखा कंटे, युवा सेनेचे अल्पेश भोईर आदींसह तालुक्यातील शिवसेनेचे विविध पदाधिकारी उपस्थित होते.

किन्हवली : कसाऱ्याचे पाणी पुस्तकाचे प्रकाशन मातोश्रीवर उद्धव ठाकरे यांच्या हस्ते संपन्न झाले