आशियातील पहिली महिला लोको पायलट होणार निवृत्‍त

आशियातील पहिली महिला लोको पायलट होणार निवृत्त
सुरेखा यादव यांची भारतीय रेल्वेत ३६ वर्षांची प्रदीर्घ सेवा

सकाळ वृत्तसेवा
मुंबई, ता. २० : सातारा जिल्ह्यातील सुरेखा यादव यांनी भारतीय रेल्वेत लोको पायलट म्हणून रुजू होत पुरुषाच्या मक्तेदारीला धक्का दिला आणि आशियातील पहिल्या महिला लोको पायलट बनून इतिहास रचला. तब्बल ३६ वर्षे सात महिन्यांच्या प्रदीर्घ सेवेनंतर त्या येत्या ३० सप्टेंबर रोजी सेवानिवृत्त होत आहेत. सुरेखा यादव यांच्या नावे अनेक विक्रम आहेत. त्यांनी १९८८मध्ये कल्याण येथून सहाय्यक लोको पायलट म्हणून कारकीर्द सुरू केली.

सुरेखा यादव यांचा हा प्रवास यशस्वी ठरला,. कारण त्यांच्यामागे कौटुबिंक पाठबळ होते. सातारा जिल्ह्यातील एका सामान्य कुटुंबात जन्मलेल्या सुरेखाने शिक्षणानंतर पारंपरिक मार्ग न निवडता रेल्वेसारख्या कठीण आणि जबाबदारीच्या क्षेत्राची निवड केली. घरच्या जबाबदाऱ्या सांभाळत आईवडील व पतीच्या पाठिंब्याने त्यांनी पुरुषाच्या मक्तेदारीला आव्हान दिले. घरातून मिळालेल्या साहस आणि प्रेरणेनेच मी कामावर पूर्ण लक्ष देऊ शकले, अशी प्रतिक्रिया सुरेखा यादव यांनी ‘सकाळ’ला दिली. सुरेखा यांनी डेक्कन क्वीन, महिला विशेष लोकल, मालगाड्या, उपनगरीय रेल्वे व घाट विभागातील कठीण मार्गावर काम केले. कल्याण मोटरमन केंद्रात प्रशिक्षण देत भावी चालकांना घडविण्याचे कामही केले. मार्च २०२३मध्ये त्यांनी सोलापूर-सीएसएमटी वंदे भारत एक्स्प्रेस चालवत मध्य रेल्वेला नवा मान मिळवून दिला. वंदे भारत एक्स्प्रेसची पहिली महिला चालक म्हणून त्यांचे नाव इतिहासात कोरले गेले. सुरेखा यांना राष्ट्रीय महिला सशक्तीकरण पुरस्कार, उत्कृष्ट लोको पायलट पुरस्कार आणि रेल्वे प्रशासनाकडून सर्वोत्तम सेवा यांसह अनेक पुरस्कार मिळाले आहेत.

क्षेत्र कोणतेही असो, आव्हाने स्वीकारण्याची जिद्द आणि काम पूर्ण करण्याची चिकाटी हवी. माझ्या रेल्वेतील कारकीर्दीकडे मागे वळून पाहिले तर ती खूप अभिमानास्पद वाटते. वरिष्ठांचे सहकार्य आणि वेळोवेळी दिलेल्या संधीसाठी मी कायम ऋणी आहे.
- सुरेखा यादव, लोको पायलट, मध्य रेल्वे