नवी मुंबईकरांना नवरात्रोत्सवाचे वेध

नवी मुंबईकरांना नवरात्रोत्सवाचे वेध
बाजारपेठा सजल्या; देवी मंदिरांना रंगरंगोटी, महिलांमध्ये उत्साह
तुर्भे, ता. २० (बातमीदार) ः शारदीय नवरात्रोत्सवाचा प्रारंभ फक्त एका दिवसावर असल्यामुळे नवी मुंबईकरांमध्ये उत्सुकता वाढली आहे. शहरातील देवी मंदिरांमध्ये उत्सवाच्या तयारीला वेग आला आहे. तर सार्वजनिक नवरात्र मंडळांमध्येही मंडप उभारणी आणि सजावटीची लगबग जोरात सुरू आहे.
बाजारपेठेत पूजा साहित्याची रंगीबेरंगी व्यवस्था नागरिकांचे लक्ष वेधत आहे. घटस्थापनेसाठी आवश्यक मडकी, घट, मुकुट, फेटे, मंदिर, तोरण, झालर, झुंबर, धान्य, माती, मातीचे दिवे अशा विविध वस्तूंची विक्री जोरात सुरू आहे. मागील वर्षाच्या तुलनेत किमतीत १०-१५ टक्क्यांची वाढ झाली असूनही ग्राहकांचा प्रतिसाद उत्साही आहे. लाकडी टिपऱ्यांसह पारदर्शक फायबर टिपऱ्यांची मागणी जास्त असून, विविध आकारांतल्या जाळीदार चुनरींची विक्रीही जोरात सुरू आहे. नवरात्र उत्सवात अनेक जण घरच्या घरी दुर्गामातेची प्रतिष्ठापना करतात. त्यासाठी रंगबिरंगी मुखवटे, दागिने, पारंपरिक पेहराव आणि नथसह तयार कम्बो सेट बाजारात उपलब्ध आहेत. महिलांमध्ये विविध रंगांच्या साड्यांची क्रेझ वाढली असून, नऊ दिवस नऊ रंगांच्या साड्या नेसण्याची प्रथा आता सार्वजनिक कार्यक्रमातही दिसून येत आहे. पुरुषांसाठीही एकाच रंगाचे शर्ट आणि कुर्ती लोकप्रिय होत आहेत.
..................
गावागावातील गावदेवी व कुलदैवत मंदिरांमध्येही रंगरंगोटी सुरू झाली आहे. प्रत्येक मंदिरात रोषणाई केली जात असून, उत्सवाची तयारी जोमात आहे. बाजारपेठेत पूजा साहित्यासह सुगंधी अगरबत्ती, धूप, कापूर, होमसाठी लागणारे साहित्यही मोठ्या प्रमाणावर उपलब्ध आहे. ग्राहकांनी उत्साहाने खरेदी सुरू केली असून, अखेरच्या दिवसापर्यंत बाजारात उलाढाल कायम राहणार आहे.