ठाण्यात उभारणार ‘बर्डअव्हरी’

ठाण्यात उभारणार ‘बर्ड ॲव्हरी’
कोलशेतमध्ये देशविदेशातील पक्षी, १० कोटी रुपयांचा निधी मंजूर
सकाळ वृत्तसेवा
ठाणे, ता. २० : ठाणेकरांना निसर्गाच्या सान्निध्यात विविध देशी-विदेशी पक्ष्यांचे दर्शन घेता यावे, यासाठी ठाणे महापालिकेच्या माध्यमातून कोलशेत येथे भव्य ‘बर्ड ॲव्हरी’ उभारण्याचा निर्णय घेण्यात आला आहे. शासनाने यासाठी १० कोटी रुपयांचा निधी मंजूर केला असून, लवकरच या प्रकल्पाचे प्रत्यक्ष काम सुरू होणार असल्याची माहिती महापालिका सूत्रांनी दिली.
कोलशेतमधील हिरानंदानी इस्टेट परिसरात ५.६८ हेक्टर शासकीय जागा महापालिकेला देण्यात आली असून, त्यातील ५.०३ हेक्टर जागेवर हे पक्षी उद्यान विकसित होणार आहे. नैसर्गिक वृक्षसंपदेमुळे शिल्लक जागा राखून पर्यावरणपूरक पद्धतीने प्रकल्प राबवण्यात येणार आहे. या ॲव्हरीमध्ये विविध प्रजातींचे पक्षी एकाच छताखाली पाहण्याची संधी ठाणेकरांना मिळणार आहे. यासाठी गार्डन लँडस्केप, पक्ष्यांचे पिंजरे आणि वरच्या बाजूस जाळी बसवण्याचे काम करण्यात येणार आहे. अभ्यास, निरीक्षण आणि प्रबोधनाच्या दृष्टीने विद्यार्थ्यांसाठी हे उद्यान उपयुक्त ठरणार आहे. या उद्यानाची निगा, देखभाल आणि संचालन खासगी संस्थेकडे दिले जाणार आहे. पक्ष्यांचे संगोपन, आहार, उपचार आणि व्यवस्थापनाची जबाबदारी या संस्थेकडे असेल. महापालिकेचा कोणताही आर्थिक सहभाग या कामकाजात नसेल. दरम्यान, या उद्यानाला तिकीट आकारले जाणार असून, त्यातून होणाऱ्या उत्पन्नातील काही हिस्सा महापालिकेला देण्यात यावा, असा प्रस्ताव तयार करण्यात येत आहे. याशिवाय या परिसरात एक छोटे मत्स्यालय उभारण्याचाही विचार महापालिका करीत आहे. त्यामुळे ठाणेकरांसाठी हे केंद्र एक प्रमुख पर्यटन व शैक्षणिक आकर्षण ठरण्याची शक्यता आहे.