महालक्ष्मी मंदिरात शारदीय नवरात्रोत्सवाची तयारी सुरू

कासा, ता. २१ (बातमीदार) : डहाणूतील महालक्ष्मी मंदिरात सोमवारपासून शारदीय नवरात्रोत्सवाला सुरुवात होत आहे. या पारंपरिक उत्सवाच्या तयारीला सध्या जोर आला असून मंदिर परिसर भक्तांच्या गजबजाटाने भरून गेला आहे.

महालक्ष्मी, संतोषी माता व सप्तशृंगी मंदिरात पुजारी मंडळी पूजाविधीच्या तयारीत व्यग्र आहेत. दसऱ्याच्या दिवशी लहान मुलांचे पाटीपूजन, तर व्यापारी वर्गात नवीन उपक्रमांची सुरुवात करण्याची परंपरा आहे. दरवर्षीप्रमाणे यंदाही गुजरात, मुंबई, ठाणे, नाशिक आणि पालघर जिल्ह्यातील भाविक मोठ्या संख्येने महालक्ष्मी मंदिरात दर्शनासाठी येणार आहेत. नुकत्याच पार पडलेल्या बारशी उत्सवानंतर मंदिर परिसरात बाजारहाटाचीही रंगत वाढली असून फुले, भाज्या व खेळण्यांच्या दुकानांवर गर्दी आहे.

महालक्ष्मी ट्रस्टने भाविकांच्या सोयीसाठी सीसीटीव्ही, पाणी, वीज रोषणाई तसेच स्वयंसेवकांची व्यवस्था केली आहे. कार्यकारी मंडळ सदस्य शशिकांत ठाकूर म्हणाले, दरवर्षीप्रमाणे भाविकांना कोणताही त्रास होऊ नये, याची खबरदारी घेतली असून, पूजाविधी वेळेवर पार पाडले जातील. डहाणू रेल्वेस्थानकातून मंदिराकडे जाण्यासाठी बस व प्रवासी रिक्षा उपलब्ध आहेत.