टेरर फंडिंग गुन्ह्यात भिवंडीतून तिघांच्या आवळल्या मुसक्या

भिवंडीत तिघांना टेरर फंडिंगप्रकरणी अटक
भिवंडी, ता. २० (वार्ताहर) : उत्तर प्रदेश दहशतवादविरोधी पथकाने (एटीएस) भिवंडी शहरातून टेरर फंडिंगच्या आरोपाखाली तीन तरुणांना अटक केली आहे. मोहम्मद अय्यान मोहम्मद हुसैन (वय २२), अबू सुफियान ताजमुल्ल (२२) आणि ज़ैद अब्दुल कादिर नोटियार (२२) अशी अटक केलेल्या आरोपींची नावे आहेत.
हे तिघेही शहरातील शांतीनगर भागात राहणारे असून, त्यांच्यावर दहशतवादी संघटनांना आर्थिक मदत केल्याचा आरोप आहे. एटीएसच्या म्हणण्यानुसार, हे तरुण एका मोठ्या टेरर फंडिंग नेटवर्कचा भाग आहेत. स्थानिक पोलिसांच्या मदतीने त्यांना ताब्यात घेण्यात आले असून, पुढील तपासणीसाठी उत्तर प्रदेशला नेण्यात आले आहे. या घटनेमुळे शहरात खळबळ उडाली आहे.