अर्धांगवायूग्रस्त व्यक्तीला नवजीवन

अर्धांगवायूग्रस्त व्यक्तीला नवजीवन
जे. जे. रुग्णालयातील डॉक्टरांनी केली यशस्वी शस्त्रक्रिया
सकाळ वृत्तसेवा
मुंबई, ता. २१ : बुलढाणा येथील ३२ वर्षीय उमेश वारे यांना सरकारी जे. जे. रुग्णालयात नवजीवन मिळाले. वारे हे अनेक महिन्यांपासून अंथरुणाला खिळून होते. मणक्याच्या क्षयरोगामुळे त्यांचे हातपाय लकवाग्रस्त झाले होते. बुलढाण्यातील डॉक्टरांच्या सल्ल्यानुसार ते जे. जे. रुग्णालयात आले होते.
जे. जे. रुग्णालयातील अस्थिरोग विभागाचे डॉ. कुशल गोहिल यांनी स्पष्ट केले की, रुग्णाच्या नसा दबल्या गेल्या होत्या, एक हाडदेखील निखळले होते. ज्यामुळे वारे यांचे हातपाय निष्क्रिय झाले होते. त्यांच्या कुटुंबीयांनी त्यांना स्ट्रेचरवर आणले. रुग्णालयाचे अधिष्ठाता डॉ. अजय भंडावार, अधीक्षक डॉ. संजय सुरासे, विभागप्रमुख डॉ. नादिर शाह, युनिटप्रमुख डॉ. संगीत गावले, भूल विभागप्रमुख डॉ. उषा बडोले यांच्या मार्गदर्शनाखाली उमेशवर शस्त्रक्रिया झाली. डॉ. कुशल यांनी सांगितले की, रुग्ण आता पूर्णपणे निरोगी आहे आणि चालण्यास सक्षम आहे. यशस्वी उपचारांसाठी उमेशने डॉक्टरांचे आभार मानले.