गोरखगडावरून खाली उतरताना पाय घसरून तरुणाचा मृत्यू

ट्रेकिंगला गेलेल्या तरुणाचा पाय घसरून मृत्यू
मुरबाड, ता. २१ (बातमीदार) : तालुक्यातील गोरखगडावर ट्रेकिंगसाठी गेलेल्या एका तरुणाचा दरीत पडून दुर्दैवी मृत्यू झाला. ही घटना शनिवारी (ता. २०) घडली असून, ऋषिकेश राजेंद्र जाधव (वय २४, रा. सोलापूर) असे या तरुणाचे नाव आहे.
ऋषिकेश हा नवी मुंबई येथे आपल्या मामाकडे आला होता. तो मित्रांसोबत गोरखगडावर फिरण्यासाठी गेला होता. गडावरून खाली उतरत असताना त्याचा पाय घसरला आणि तो सुमारे १०० फूट खोल दरीत पडला. बुटांना योग्य ग्रीप न मिळाल्याने आणि रस्ता निसरडा झाल्यामुळे हा अपघात घडला. अपघातात गंभीर दुखापत झाल्याने त्याचा जागीच मृत्यू झाला. रात्री उशिरा त्याचा मृतदेह दरीतून बाहेर काढण्यात यश आले. याबाबत मुरबाड पोलिस ठाण्यात आकस्मिक मृत्यूची नोंद करण्यात आली आहे.