कामोठेत एकता सामाजिक संस्थेने घातले पनवेल महानगर पालिकेच्या रस्ते व बांधकाम विभागाचे श्राध

कामोठेत रस्ते व बांधकाम विभागाचे श्राद्ध
पनवेल, ता. २१ (बातमीदार)ः पनवेल क्षेत्रात रस्ते दुरुस्तीसाठी पालिकेने १०० कोटी खर्च केले आहेत. यानुसार कामोठेमध्ये १० कोटी खर्च केले असले तरी रस्‍त्यावर खड्डेच खड्डे दिसत आहेत. पालिकेला वेळोवेळी निवेदने देऊनही मात्र प्रशासन पावसाकडे बोट दाखवत दुर्लक्ष करत आहे. यामुळे एकता सामाजिक संस्थेने रस्ते व बांधकाम विभागाचे श्राद्ध घातले.
कामोठेत मोठ्या प्रमाणावर रस्त्यांची दुरवस्था झाली आहे. पालिकेने फक्त चार-पाच मजूर लावून तात्पुरती रस्त्यावरील खडी साफ करण्याचे काम केले, परंतु रस्त्यांची स्थिती जैसे थैच आहे. या खड्ड्यांमुळे अनेक लहान मोठे अपघातही होतात. दुसरीकडे खड्ड्यांच्या बाजूला राजकीय नेत्यांच्या उत्सवाच्या कमानी पाहून नागरिक रोष व्यक्त करत आहेत. पालिकेच्या ढिसाळ कारभाराला कंटाळून १० दिवसांपूर्वी एकता सामाजिक संस्थेने खडी साफ केली होती. तरीही पालिकेला काहीही फरक पडला नाही. त्यामुळे सर्वपितरी अमावस्याच्या दिवशी कामोठे पोलिस ठाणेसमोरील चौकात रस्ते व बांधकाम खात्याचा निषेध म्हणून एकता सामाजिक संस्थेने या विभागाचे फलक लावून श्राद्ध घातले. सोबत चार आण्याचे नाणे ठेवून निषेध व्यक्त केला.
या वेळी अमोल शितोळे, सचिन त्रिमूखे, प्रशांत कुंभार, ॲड. समाधान काशीद, अरुण जाधव, त्रिशा घोडे, उमेश गायकवाड, संगीता पवार आदी उपस्थित होते. याकडे नागरिक मात्र उत्सुकतेने पाहात होते.