ग्रॅण्टरोडला अवतरली कोल्हापूरची महालक्ष्मी

ग्रॅण्ट रोडला अवतरली कोल्हापूरची महालक्ष्मी
मुंबई, ता. २२ : ग्रॅण्ट रोड विभागातील अलिभाई प्रेमजी मार्ग येथील स्वराज प्रतिष्ठान श्री साईनाथ युवा मित्र मंडळाने यावर्षी कोल्हापूरची महालक्ष्मी अंबाबाईची प्रतिकृती साकारली आहे. देवीच्या दर्शनासाठी नवरात्राेत्‍सवाच्या पहिल्‍या दिवशी सोमवारी भाविकांनी गर्दी केली होती.
नवरात्रोत्‍सवाचे मंडळाचे यंदाचे ४० वे वर्ष असून, हे मंडळ देवीच्या वेगवेगळ्या प्रतिकृतीसाठी प्रसिद्ध आहे. मंडळाकडून सातत्‍याने सामाजिक उपक्रम राबवले जातात. महाप्रसाद, जागरण गोंधळ, विद्यार्थ्यांना शालेय मदत, गरजू कुटुंबांना मदत करण्यावर भर असतो. मंडळाचे पदाधिकारी अनिल नागरे यांनी सांगितले की, यंदाची मूर्ती ही प्रसिद्ध मूर्तिकार सुनील भोसले यांनी साकारली आहे. वेशभूषा सचिन घुगे यांनी केली आहे. ग्रॅण्ट रोड पूर्व विभागात मोठ्या प्रमाणात व्यापारीवर्गदेखील राहत आहे. आपला उद्योगधंदा व्यवस्थित चालावा, यासाठी येथील व्यापारी लोक आवर्जून देवीचे दर्शन घेण्यासाठी येतात. डी. बी. मार्ग पोलिस ठाण्याचे कर्मचारी व अधिकारी देवीचे दर्शन घेत असल्याचे मंडळाचे अध्यक्ष डॉ. दिलीप नागरे यांनी सांगितले.
दरवर्षी आम्‍ही कोल्‍हापूरच्या अंबाबाईचे दर्शन घेण्यासाठी जातो, परंतु यंदा मुंबईतच अंबाबाईचे दर्शन घडले, असे भाविक दत्ता कोळेकर यांनी सांगितले. माझे मोबाईलचे दुकान बंद ठेवून नवरात्रोत्‍सवात देवीच्या सेवेत स्‍वतःला वाहून देतो, अशी प्रतिक्रिया भाविक अभिषेक शिंदे यांनी दिली.