यशवंतराव चव्हाण प्रतिष्ठानतर्फे शिक्षकांचा गौरव

यशवंतराव चव्हाण प्रतिष्ठानतर्फे शिक्षकांचा गौरव
टोकावडे, ता. २२ (बातमीदार) : मुरबाड तालुक्यातील महात्मा गांधी विद्यालय व कनिष्ठ महाविद्यालय, धसई येथे यशवंतराव चव्हाण प्रतिष्ठान ठाणे जिल्हा केंद्राच्या वतीने शिक्षक दिनानिमित्त शिक्षकांच्या कार्याचा गौरव करण्यासाठी विशेष सत्कार सोहळा झाला. कार्यक्रमाला प्रमुख पाहुणे म्हणून मुरलीधर नाले, डॉ. महेश केळुसकर, अमोल नाले, शालेय समितीचे अध्यक्ष श्रीधर घोलप, केंद्रप्रमुख राजाराम घुडे, प्राचार्य प्रमोद घोलप व वरिष्ठ शिक्षक शरद धनराळे उपस्थित होते. त्यांच्या हस्ते शिक्षकांचा सत्कार करण्यात आला. विद्यार्थ्यांच्या सर्वांगीण विकासासाठी योगदान देणाऱ्या शिक्षकांच्या कार्याची या वेळी विशेष प्रशंसा करण्यात आली. सत्कारमूर्ती म्हणून प्रणाली घोलप, गणेश ठाकरे, अनंत भोंडिवले, शिल्पा तारमळे व सुदर्शन पाटील यांचा शाल, श्रीफळ व सन्मानचिन्ह देऊन गौरव करण्यात आला. पुरस्कारार्थींनी अध्यापनातील अनुभव मांडले. तर मान्यवरांनी त्यांच्या समाजोपयोगी कार्याचा व विद्यार्थ्यांच्या जीवनात घडवलेल्या सकारात्मक बदलांचा विशेष उल्लेख केला. या उपक्रमामुळे शिक्षकांना नवी ऊर्जा मिळून विद्यार्थ्यांच्या घडवणुकीच्या कार्यात अधिक प्रेरणा मिळणार असल्याचे मान्यवरांनी नमूद केले.