कपडा उत्पादकाची एक कोटीची फसवणूक

कपडा उत्पादकाची एक कोटीची फसवणूक
भिवंडी, ता. २२ (वार्ताहर) : शहरातील यंत्रमाग उद्योग नगरीत कपडा उत्पादन मोठ्या प्रमाणावर होते. देशभरातून या कपड्याची मागणी असताना भिवंडीतून खरेदी केलेल्या कपड्याचे पैसे न देता एका व्यावसायिकाने कपडा उत्पादकाची मोठी फसवणूक केल्याची घटना समोर आली आहे. पोलिसांनी दिलेल्या माहितीनुसार, मुंबईत राहणारे संजय मिश्रीमल सिंधी यांनी उत्पादित केलेला कपडा तालुक्यातील राहनाळ गावातील पांडुरंग कंपाउंड येथील गोदामात साठवला होता. संजय सिंधी यांनी ११ नोव्हेंबर २०२४ ते १० फेब्रुवारी २०२५ या कालावधीत राजस्थानमधील नवलगढ, शिखर येथील कन्हैयालाल सैनी, विनोद सैनी, दीपक कन्हैयालाल सैनी, विद्या कन्हैयालाल सैनी यांना त्यांच्या कंपनी मेसर्स सचिन टेक्सटाईल्सला २४ लाख २४ हजार ९२७ रुपये किमतीचा आणि मे. श्री शामबाब टेक्सटाईल्स या कंपनीला ७८ लाख २३ हजार ५१७ रुपये किमतीचा माल विक्री केला होता, मात्र या कंपन्यांकडून मालाच्या पैशांची मागणी करूनही पैसे न मिळाल्याने संजय सिंधी यांनी फसवणुकीची तक्रार नारपोली पोलिस ठाण्यात केली. चौकशीत त्यांची फसवणूक स्पष्ट झाल्यानंतर, नारपोली पोलिसांनी चौघांविरोधात गुन्हा दाखल केला आहे.