भातपिकांत रानडुकरांचा धुमाकूळ

डहाणू, ता. २२ (बातमीदार) : तालुक्याच्या पश्चिम किनारपट्टीवरील वरोर, वाढवण, बाडापोखरण गाव आणि परिसरात कापणीला आलेल्या भातशेतात रानडुकरांच्या कळपांनी धुमाकूळ घातला आहे. काही दिवसांनी कापणीला आलेल्या पिकाचे नुकसान पाहून शेतकरी हैराण झाले आहेत. रात्रीच्या वेळी रानडुकरांचे कळप कापणीवर आलेल्या भातपिकांच्या शेतात घुसून मोठ्या प्रमाणावर नुकसान करीत आहेत. याशिवाय हा रानडुकरांचा कळप शेतात शिरल्यानंतर बांधावर असणारी, तसेच भातखाचरात लागवड केलेल्या कंदमुळांना घातलेले शेणखत धारदार सुळ्यांनी उखडून टाकतात. त्यामुळे शेतकऱ्यांचे मोठ्या प्रमाणावर नुकसान होऊन त्यांना आर्थिक फटका बसत आहे. ही रानडुकरे रात्रीच्या वेळी शेतात येतात, तर दिवसा झुडपामध्ये लपून राहत असतात. या रानडुकरांची पैदासही फार मोठ्या प्रमाणावर होत असल्याने त्यांचे थवेच्या थवे शेतात घुसून पिकांची नासाडी करतात.