खारघरसाठी वाहनतळ उभारण्यात यावे

वाहनतळासाठी पोलिसांचे स्मरणपत्र
खारघरमधील कोंडी सोडविण्यासाठी हालचाली
खारघर, ता. २३ (बातमीदार) ः परिसरातील सेंट्रल पार्क, इस्कॉन परिसर, घरकुल वसाहत महामार्ग, सत्यसाई बाबा रुग्णालयालगत सुसज्ज वाहनतळ उभारण्यात यावे, असे पत्र नवी मुंबई वाहतूक विभागाचे पोलिस उपायुक्त तिरुपती काकडे यांनी पालिका आयुक्त, सिडकोच्या व्यवस्थापकीय संचालकांना दिले आहे. त्यामुळे शहरातील कोंडी सोडविण्यासाठीच्या हालचालींना वेग आला आहे.
खारघर वाहतूक शाखा हद्दीत रेल्वेस्थानक- बेलपाडा- उत्सव चौक- शीघ्र कृती दल कोपरा सिग्नल, खारघर टोलनाका यांचा समावेश आहे. खारघरमध्ये लिटिल वर्ल्ड मॉल, खारघर रेल्वेस्थानक येथे वाहनतळ आहे. विशेष म्हणजे, खारघरमधील टाटा हॉस्पिटल, इस्कॉन मंदिर, शिल्प चौक, डेलीबाजार सिग्नल, डी मार्ट, नवरंग चौक तसेच खारघर सेक्टर १२ ते २० भागात सातत्याने कोंडी होते. या भागात बाजारपेठ असून लोकसंख्या अधिक आहे. शहराची वाढती लोकसंख्या, वाढती वाहने तसेच परिसरात हॉटेल, उद्योग- व्यवसाय असल्याने रस्त्यावर वाहने उभी केली जातात. त्यामुळे वाहतुकीच्या कोंडीचा प्रश्न जटिल झाला आहे.