पालघर जिल्ह्यात प्रारंभ

स्वस्थ नारी, सशक्त परिवार अभियानाला पालघरमध्ये सुरुवात
पालघर, ता. २३ (बातमीदार) ः देशभरात महिलांच्या आरोग्य व पोषणासाठी केंद्र सरकारतर्फे स्वस्थ नारी, सशक्त परिवार अभियान राबवले जात असून, त्याची सुरुवात पालघर येथे ग्रामीण रुग्णालयातही झाली आहे. खासदार डॉ. हेमंत सवरा, आमदार राजेंद्र गावित, मुख्य कार्यकारी अधिकारी मनोज रानडे, माजी जिल्हा परिषद अध्यक्ष प्रकाश निकम यांच्या प्रमुख उपस्थितीत या कार्यक्रमाची सुरुवात करण्यात आली.
या अभियानाच्या निमित्ताने महिलांसाठी रक्तदाब, मधुमेह, स्तन व गर्भाशय मुखाचा कर्करोग, एचआयव्ही, क्षयरोग, सिकल सेल, दंत तपासणी आदी विविध चाचण्या मोफत उपलब्ध करून दिल्या जाणार आहेत. अंगणवाडी स्तरावर पूरक आहार पाककृती प्रदर्शन, पोषण शपथ, स्थानिक आहाराचा प्रसार, ॲनिमिया जनजागृती, योग व मानसिक आरोग्य उपक्रम घेण्यात येणार आहेत. महिलांचे आरोग्य हेच सशक्त कुटुंब आणि मजबूत समाजाचा पाया आहे. त्यामुळे प्रत्येकाने या अभियानात सक्रिय सहभागी व्हावे, असे आवाहन सवरा यांनी केले.
राजेंद्र गावित म्हणाले की, ग्रामीण भागातील महिलांना मोफत तपासण्या आणि पोषण सेवा उपलब्ध करून देणे हा या उपक्रमाचा उद्देश असून, तो प्रत्येक घराघरात पोहोचला पाहिजे, तर मनोज रानडे यांनी आरोग्य तपासण्या, प्रत्येक महिला आणि बालकाने आपल्या जवळच्या आरोग्य केंद्र, अंगणवाडी किंवा आयुष्मान केंद्राशी संपर्क साधून या अभियानाचा फायदा नक्की घ्यावा, असे आवाहन केले.
जिल्हा शल्यचिकित्सक डॉ. रामदास मराड, जिल्हा आरोग्य अधिकारी डॉ. संतोष चौधरी, जिल्हा कार्यक्रम अधिकारी व्यंकटराव हुंडेकर, डॉ. उमेश दुम्पलवार, आशा ताई डॉ. दीप्ती गायकवाड आणि अंगणवाडी सेविका आणि आरोग्य विभागाचे अधिकारी आणि कर्मचारी उपस्थित होते.