टोळीप्रमुखावर मोक्का कायद्यांतर्गत कारवाई

ठाण्यात टोळीप्रमुखावर मोक्का कारवाई
सकाळ वृत्तसेवा
ठाणे, ता. २३ ः ठाणे शहर पोलिसांनी संघटित गुन्हेगारी टोळी तयार केल्याच्या आरोपाखाली २२ वर्षीय टोळीप्रमुख सुमीत ऊर्फ लाल सुनील कदम यावर कडक कारवाई केली आहे. सुमीतने वेगवेगळ्या साथीदारांसह गुन्हेगारी टोळी तयार करून अनेक गुन्हे केले असल्याचे पोलिसांनी सांगितले.
सुमीत कदमविरोधात विठ्ठलवाडी पोलिस ठाण्यात विविध कलमांतर्गत गुन्हा दाखल करण्यात आले आहेत. शुक्रवारी (ता. ५) बदलापूर पूर्व येथून त्याला अटक करण्यात आली. त्या वेळी सुमीतने त्याचे साथीदार तीन विधिसंघर्षित बालके यांच्यासह गुन्हे केल्याची कबुली दिली. त्याच्या गुन्हेगारी अभिलेखांनुसार आणि टोळीची गुन्हेगारी प्रवृत्ती लक्षात घेता त्याच्यावर कडक प्रतिबंधक कारवाई करणे आवश्यक असल्याने यासंदर्भात कल्याण अपर पोलिस आयुक्त संजय पवार यांच्याकडे प्रस्ताव सादर करण्यात आला होता. मंजुरीनंतर सुमीत कदमविरोधात कारवाई करण्यात आली आहे. पुढील तपास उल्हासनगर विभागाचे सहाय्यक पोलिस आयुक्त अमोल कोळी यांच्या मार्गदर्शनाखाली सुरू आहे.