पालिकेची उद्याने, मैदानाच्या देखभालीसाठी कंत्राट

पालिकेची उद्याने, मैदानाच्या देखभालीसाठी कंत्राट
प्रशासनाच्या निर्णयाला कॉँग्रेस, राष्ट्रवादीकडून विरोध

सकाळ वृत्तसेवा
मुंबई, ता. २३ ः महापालिकेच्या अखत्यारित असलेली सुमारे २५० उद्याने, खेळ व मनोरंजन मैदाने तसेच विविध भूखंड यांच्या देखभालीचे काम कंत्राटदाराकडे देण्याचा हालचाली सुरू केल्या आहेत. यासाठीची निविदा प्रक्रियाही सुरू असल्याचे पालिकेच्या सूत्रांकडून समजते; मात्र याला काँग्रेस आणि राष्ट्रवादी काँग्रेस (शरदचंद्र पवार) पक्षाकडून विरोध केला जात आहे.

मुंबई महापालिकेची घाटकोपर, मुलुंड आणि भांडुप परिसरात सुमारे २५० उद्याने व मनोरंजन मैदाने आहेत. ती देखभालीसाठी यापूर्वीही खासगी कंत्राटदारांकडेच देण्यात आली होती. आता पुन्हा ऑक्टोबर २०२७ पर्यंत दोन वर्षांसाठी त्यांची देखभाल करण्यासाठी कंत्राटदारांना देण्यात येणार आहेत. उद्याने, मैदाने, मोकळे भूखंड खासगी कंत्राटदारांना देण्याच्या विरोधात यापूर्वी महापालिका सभागृहात नगरसेवकांकडून तीव्र विरोध केला होता. सध्या गेल्या तीन वर्षांपासून पालिकेत प्रशासकीय राजवट असल्याने या निर्णयाला विरोध करण्यास कोणीही नसल्याचा आरोप करीत काँग्रेस आणि राष्ट्रवादी काँग्रेसने पालिका प्रशासनाच्या या निर्णयाला विरोध केला आहे. खासगी कंत्राटदार पालिकेच्या उद्याने व मैदानाचा बेसुमार व्यावसायिक लाभ घेत असल्याचे आरोप झाल्याने कंत्राटाचा कालावधी कमी करून आता एक ते दोन वर्षांपुरते कंत्राट दिले जात आहे.

कंत्राटदारांना अनुकूल हे सरकार आहे. मुंबईतील प्रत्येक मोकळी जागा त्यांच्या आवडत्या कंत्राटदारांसाठी आणि बांधकाम व्यावसायिकांसाठी ते देत आहेत. पालिकेत नगरसेवक नसल्याचा फायदा ते घेत आहेत. या सरकारने मुंबईतील सर्व मोकळ्या जागा, मग ती महालक्ष्मी रेसकोर्स मैदान असो, आरेची जमीन असो किंवा मुलुंड आणि ठाण्यातील स्वीट गार्डन्स असो, आपल्या मित्रांमध्ये आधीच वाटून घेतल्या आहेत. कंत्राटदारांना उद्याने देण्यास आमचा पूर्ण विरोध आहे.
- वर्षा गायकवाड, अध्यक्ष, मुंबई काँग्रेस

मैदाने आणि उद्याने खासगी कंत्राटदारांना देखभालीसाठी देण्यास आमच्या पक्षाचा ठाम विरोध आहे. खासगी कंत्राटदारांच्या आहारी सत्ताधारी पक्ष गेला आहे. उद्या सत्ताधारी पक्षाच्या घरातल्या लोकांनाही पालिका प्रशासन कामे देईल. बेस्टमध्ये बस कंत्राटी घेतल्या. घनकचरा व्यवस्थापनात कंत्राटीकरण आणले. कंत्राटदार हात वर करतात. जबाबदारीचे काय?
- राखी जाधव, अध्यक्ष, राष्ट्रवादी काँग्रेस (शरदचंद्र पवार) पक्ष
-------------