म्हाडाच्या शिरढोन गृहप्रकल्पामधून विरार-अलिबाग मल्टी काॅरिडाॅरची वाट!

विरार-अलिबाग मल्टी काॅरिडाॅरला म्हाडाची ‘वाट’!
शिरढोन येथील पाच हेक्टर जमिनीच्या मोबदल्याची मागणी
सकाळ वृत्तसेवा
मुंबई, ता. २३ ः मुंबईसह एमएमआर क्षेत्रातील वाहतुकीला चालना देण्यासाठी महाराष्ट्र राज्य रस्ते विकास महामंडळाकडून विरार-अलिबाग मल्टी काॅरिडाॅर उभारला जात आहे. सुमारे १२६ किलोमीटर लांबीचा हा ग्रीनफिल्ड महामार्ग म्हाडाच्या कल्याण तालुक्यातील शिरढोन येथील १६ हजार घरांच्या गृहप्रकल्पातून जाणार असल्याचे निश्चित झाले आहे. त्यासाठी तब्बल पाच हेक्टर जमीन म्हाडाला द्यावी लागणार आहे. त्यामुळे या जमिनीच्या मोबदल्यात किमान ५० ते ६० कोटी रुपयांची भरपाई मिळावी, यासाठी म्हाडाच्या कोकण मंडळाने धडपड सुरू केली आहे.

म्हाडाकडून सर्वसामान्यांना जास्तीत जास्त घरे उपलब्ध व्हावीत, म्हणून कल्याण तालुक्यातील शिरढोन येथे म्हाडाकडून तब्बल १६ हजार घरांचा प्रकल्प राबवला जात आहे. त्यापैकी सुमारे १० हजार घरे तयार झालेली आहेत. दरम्यान, एमएसआरडीसीच्या मल्टी काॅरिडाॅरसाठी ५०० मीटर लांबीचा आणि १०० मीटर रुंदीचा भूखंड म्हाडाला द्यावा लागणार आहे. त्यामुळे प्रकल्पाची विभागणी होणार आहे. त्याबाबतचे एमएसआरडीसीने संरेखन पूर्ण केलेले असल्याने आता म्हाडानेही पैसे मिळवण्यासाठी हालचाली सुरू केल्या असून त्याबातचे पत्र लवकरच एमएसआरडीसीला दिले जाणार असल्याचे म्हाडाच्या एका वरिष्ठ अधिकाऱ्याने सांगितले.

शिरढोन गृहप्रकल्पाला फायदा
विरार-अलिबाग मल्टी काॅरिडाॅरच्या नियोजित आराखड्यानुसार शिरढोन येथील म्हाडाच्या गृहप्रकल्पानजीकच इंटरचेंज होणार आहे. त्यामुळे येथील नागरिकांना या काॅरिडाॅरचा वापर करता येणार आहे. परिणामी, म्हाडाच्या या गृहप्रकल्पाला फायदा होऊ शकणार आहे.