नवरात्रीनिमित्त डोंबिवलीत अद्वितीय संगम

नवरात्रीनिमित्त डोंबिवलीत अद्वितीय संगम
श्रीनृसिंह सरस्वती धाममध्ये गुरुपीठ आणि शक्तिपीठ एकत्र

डोंबिवली, ता. २३ ः डोंबिवली पूर्वेतील काटई परिसरात वसलेले श्रीनृसिंह सरस्वती धाम आज भक्तांसाठी एक अद्वितीय आध्यात्मिक ठिकाण ठरले आहे. १३ वर्षांपूर्वी मार्च २०१२ मध्ये या मंदिराची स्थापना झाली. गेल्या वर्षी नवरात्रोत्सवामध्ये मंदिरात साडेतीन शक्तिपीठांची स्थापना करण्यात आली. या मूर्ती संत नामदेव पथ येथील दुर्गा परमेश्वरी मंदिराकडून भेट म्हणून आल्या आहेत. नवरात्रीनिमित्त गुरुपीठ आणि शक्तिपीठाचा अनोखा संगम तिथे पाहायला मिळत आहे.
यापूर्वी सरस्वती धाम साधना केंद्र म्हणून ओळखले जात होते. सद्गुरू श्री दादा महाराज झुरळे यांच्या प्रेरणेने आताचे मंदिर उभारण्यात आले असून, स्थापनेपासून विश्वस्त अविनाश झुरळे आणि त्यांची पत्नी सुभगा झुरळे यांच्यातर्फे त्यांची व्यवस्था नियोजनबद्धपणे सांभाळली जात आहे.
मंदिराचे वैशिष्ट्य म्हणजे येथील सर्व मूर्ती भेटस्वरूप आल्या आहेत. सरस्वती धामात वर्षभर विविध उत्सव आणि धार्मिक कार्यक्रमांचा उत्साह अनुभवता येतो. गुरुपौर्णिमा, रामनवमी, टेंबे स्वामी उत्सव, स्वामी समर्थ जयंती, दत्त जयंती आणि नवरात्रोत्सव मोठ्या भक्तिभावाने साजरा केला जातो. दर शनिवारी संध्याकाळी होणारा पालखी सोहळा भक्तांसाठी विशेष आकर्षण ठरतो. श्री श्रीपाद श्रीवल्लभ, श्री दत्तात्रेय, श्री नृसिंह सरस्वती स्वामी महाराज श्री टेंबे स्वामी, श्री अक्कलकोट स्वामी समर्थ, शक्तिपीठातील प्रमुख देवता, श्री दुर्गा परमेश्वरी, श्री महालक्ष्मी देवी, श्री सप्तशृंगी माता श्री तुळजाभवानी माता, श्री रेणुका माता आणि श्री पद्मावती माता गुरुपीठातील प्रमुख देवता आहेत.