कल्याणमध्ये अल्पवयीन मुलीवर सामूहिक बलात्कार

कल्याणमध्ये अल्पवयीन मुलीवर सामूहिक अत्याचार
पोलिसांकडून सात आरोपींना अटक
कल्याण, ता. २३ (वार्ताहर) ः कल्याणमधील महात्मा फुले पोलिस ठाण्याच्या हद्दीत एका अल्पवयीन मुलीवर सामूहिक अत्याचार झाल्याची घटना समोर आली आहे. या प्रकरणात आठ जणांनी वेळोवेळी मुलीवर अत्याचार केल्याचा आरोप आहे. पीडित मुलगी गर्भवती राहिल्यानंतर हा प्रकार उघडकीस आला.
पीडितेच्या वडिलांनी तत्काळ पोलिसांकडे तक्रार दाखल केली. त्यानंतर पोलिसांनी तत्काळ कारवाई करीत आठपैकी सात आरोपींना अटक केली आहे, तर एकाचा शोध सुरू आहे. धक्कादायक म्हणजे, पीडितेच्या एका नातेवाइकानेच समाजमाध्यमावर ‘बॉयफ्रेंड देतो’ असे प्रलोभन दाखवून हे घृणास्पद कृत्य घडवून आणले. सर्व आरोपींना मंगळवारी (ता. २३) न्यायालयात हजर करण्यात आले असून, त्यांना मंगळवार (ता. ३०)पर्यंत पोलिस कोठडी सुनावण्यात आली आहे.
या प्रकरणातील आरोपींच्या वकिलांनी पीडित मुलीच्या वयाची चौकशी करण्याची मागणी न्यायालयाकडे केली आहे. त्यामुळे या प्रकरणात आता पोलिसांच्या पुढील तपासाकडे आणि न्यायालयाच्या भूमिकेकडे सर्वांचे लक्ष लागले आहे.