डहाणूत धूपप्रतिबंधक बंधाऱ्यासाठी निधी मंजूर

डहाणू, ता. २५ (बातमीदार) : तालुक्यातील पश्चिम किनारपट्टीवरील डहाणूगाव, डहाणू आगर, नरपड, गुंगवाडा, तडीयाळे गावांत समुद्राच्या भरतीचे पाणी शिरून मच्छीमारांच्या घरांचे मोठ्या प्रमाणावर नुकसान होते. ज्या गावात धूपप्रतिबंधक बंधारे नाहीत, त्या ठिकाणी अत्यंत वाईट अवस्था आहे. समुद्राच्या भरतीचे पाणी मच्छीमारांच्या वस्तीत शिरू नये, त्याचबरोबर समुद्रकिनाऱ्याची धूप होऊ नये, यासाठी राज्य सरकारने या पाच गावांतील धूपप्रतिबंधक बंधारे बांधण्यासाठी ३६ कोटी ८४ लाखांचा निधी मंजूर केला आहे.

पश्चिम किनारपट्टीवरील गावांतील समुद्रकिनाऱ्यांची धूप होते. या गावात धूपप्रतिबंधक बंधारे बांधण्याची मागणी मच्छीमार सहकारी सोसायट्यांच्या माध्यमातून सतत करण्यात येत होती. त्याप्रमाणे आपत्ती व पुनर्वसन खात्याने धूपप्रतिबंधक बंधारे बांधण्याच्या कामाला मान्यता दिली आहे. पाच गावांच्या समुद्रकिनाऱ्यावर बंधारे बांधण्याच्या कामांना राज्य आपत्ती व्यवस्थापन प्राधिकरणाने डिसेंबर २०२३ मध्ये मान्यता दिली होती. या कामासाठी ७५ टक्के निधी केंद्र, तर २५ टक्के निधी राज्य सरकारकडून दिला जाणार आहे.

तालुक्यातील गावांना मदत
गावाचे नाव निधी (कोटींमध्ये)
डहाणूगाव ५.२०
डहाणू आगर ८.५३
नरपड ८.५३
गुंगवाडा ७.७०
तडीयाळे ६.८६