पालिकेत मलेरियासह हिवताप विभाग सुरू करावे

पालिकेत मलेरियासह हिवताप विभाग सुरू करावेत
शेतकरी कामगार पक्षाची आयुक्‍तांकडे पत्रद्वारे मागणी
खारघर, ता. २५ (वार्ताहर) : पनवेल महापालिकेच्या हद्दीत मलेरिया व हिवताप प्रतिबंधासाठी स्वतंत्र विभाग उभारावेत, अशी मागणी शेतकरी कामगार पक्षाचे कार्यालयीन चिटणीस तसेच कृषी उत्पन्न बाजार समितीचे संचालक देवेंद्र मढवी यांनी पालिका आयुक्तांना पत्राद्वारे केली आहे.
पनवेल महापालिकेची स्थापना होऊन सात वर्षे पूर्ण झाली तरी अद्यापपर्यंत मलेरिया व हिवताप प्रतिबंधासाठी कोणताही स्वतंत्र विभाग सुरू केलेला नाही. पालिकेच्या हद्दीत शहरी तसेच ग्रामीण भागांचा समावेश असल्यामुळे काही भागात सांडपाण्याचा निचरा व्यवस्थित न होणे, डास अळींची वाढ आणि नागरिकांच्या आरोग्यावर होणारा धोका वाढला आहे. विशेषतः पाण्याच्या साठ्यामुळे डास अळींची उत्पत्ती होत असल्याचे स्थानिक नागरिकांच्या तक्रारीतून स्पष्ट झाले आहे. पालिकेकडून धुरीकरणाचे काम केले जाते, परंतु त्याचा परिणाम काय होत आहे आणि डास अळी नष्ट होतात का, याबाबत कामगारांना किंवा नागरिकांना कोणतीही माहिती दिलेली नाही. तसेच धुरीकरणासाठी काम करणाऱ्या कामगारांना प्रशिक्षणही दिले जात नाही. यामुळे धुरीकरणाची कार्यक्षमता कमी होत असल्याचे देवेंद्र मढवी यांनी पत्रामध्ये नमूद केले आहे. त्यांनी सांगितले की, नागरिकांचे आरोग्य सुरक्षित ठेवण्यासाठी व डास अळी नियंत्रणासाठी पालिकेकडे मलेरिया व हिवताप विभाग असणे आवश्यक आहे. हा विभाग डास निर्मूलनासाठी नियोजित उपाययोजना राबवेल तसेच नागरिकांमध्ये जनजागृती करण्याचे काम करेल.