गोरेगाव-मुलुंड लिंक रोडच्या भुयारीकरणासाठी जपानी मशीन

गोरेगाव-मुलुंड लिंक रोडच्या भुयारीकरणासाठी जपानी मशीन

सकाळ वृत्तसेवा
मुंबई, ता. २५ ः पूर्व आणि पश्चिम उपनगरांना जोडणारा गोरेगाव-मुलुंड लिंक रोड (जीएमएलआर) हा महत्त्वाकांक्षी प्रकल्प आता निर्णायक टप्प्यावर पोहोचत आहे. दादासाहेब फाळके चित्रनगरी परिसरात उभारण्यात येणाऱ्या भूमिगत जुळ्या बोगद्यांच्या कामासाठी अत्याधुनिक टनेल बोअरिंग मशीन (टीबीएम) दाखल झाले आहे. या मशीनचे सर्व ७७ कंटेनर जपानहून आयात करण्यात आले असून, दुसऱ्या टीबीएमचे भाग डिसेंबर २०२५ पर्यंत येणार आहेत.
टीबीएमद्वारे भुयारीकरण सुरू करण्यापूर्वी महापालिकेकडून लॉन्चिंग शाफ्ट खोदण्याचे काम वेगाने सुरू झाले आहे. आतापर्यंत साडेतीन मीटर खोल शाफ्ट खोदण्यात आला आहे. वरिष्ठ अधिकाऱ्यांच्या माहितीनुसार, या बोगद्याच्या बांधकामासाठी तब्बल तीन लाख क्युबिक मीटर भुयारीकरण करावे लागणार आहे. जीएमएलआर प्रकल्पाअंतर्गत गोरेगावच्या दादासाहेब फाळके चित्रनगरीपासून मुलुंडच्या खिंडीपाडापर्यंत जुळे भूमिगत बोगदे बांधण्यात येणार आहेत. सध्या पूर्व आणि पश्चिम उपनगरांना जोडण्यासाठी केवळ घाटकोपर-मुलुंड लिंक रोड, अंधेरी-घाटकोपर मार्ग तसेच संजय गांधी राष्ट्रीय उद्यानातून जाणारे रस्ते उपलब्ध आहेत. वाहतूक कोंडीमुळे नागरिकांना प्रचंड त्रास सहन करावा लागतो. जीएमएलआर पूर्ण झाल्यानंतर गोरेगाव ते मुलुंड यादरम्यानचा प्रवास १५-२० मिनिटांत पार होण्याची शक्यता आहे.
...
बोगद्याविषयी...
- प्रत्येक बोगद्यात तीन मार्गिका असतील.
- एकूण लांबी सुमारे ४.७० किमी इतकी असेल.
- बोगद्याचा अंतर्गत व्यास १३ मीटर ठेवण्यात आला आहे.
- बोगदे संजय गांधी राष्ट्रीय उद्यानाच्या डोंगराखालून (२० ते १६० मीटर खोलीवर) जाणार आहेत.
- प्रकल्पाची एकूण कालमर्यादा ६० महिने निश्चित केली आहे.
- या कामाचे कंत्राट जे. कुमार - एनसीसी कन्सोर्टियम यांना देण्यात आले आहे.