सानपाडा पोलिस ठाण्याच्या इमारतीचे मुख्यमंत्र्यांच्या हस्ते उद्घाटन

सानपाडा पोलिस ठाण्याच्या इमारतीचे मुख्यमंत्र्यांच्या हस्ते उद्घाटन
नवी मुंबई, ता. २५ (वार्ताहर) : मुख्यमंत्री देवेंद्र फडणवीस यांच्या हस्ते गुरुवारी नवी मुंबईतील सानपाडा पोलिस ठाण्याच्या नवीन आणि अत्याधुनिक इमारतीचे उद्घाटन झाले. सुमारे १० कोटी रुपये खर्चून १८ हजार चौरस फूट जागेवर ही चार मजली इमारत बांधण्यात आली आहे. यावेळी फडणवीस यांनी संपूर्ण पोलिस ठाण्याची पाहणी करून उपस्थित अधिकाऱ्यांकडून माहिती घेतली. यावेळी वनमंत्री गणेश नाईक, सार्वजनिक बांधकाममंत्री शिवेंद्रराजे भोसले, आमदार मंदा म्हात्रे यांच्यासह अनेक राजकीय नेते तसेच महाराष्ट्र राज्य पोलिस गृहनिर्माण आणि कल्याण महामंडळाच्या व्यवस्थापकीय संचालक अर्चना त्यागी, पोलिस आयुक्त मिलिंद भारंबे आदी वरिष्ठ पोलिस अधिकारी उपस्थित होते.
या कार्यक्रमात मुख्यमंत्र्यांनी ई-संवाद ऑनलाइन सेवेचेही उद्घाटन केले. नवी मुंबई पोलिस आयुक्तालयातील वाशी, सीबीडी आणि पनवेल तालुका या तीन पोलिस ठाण्यांना आयएसओ मानांकन प्रमाणपत्र देऊन गौरविण्यात आले. हे मानांकन स्वच्छता आणि तक्रारदारांना पुरविल्या जाणाऱ्या सेवांसाठी देण्यात आले आहे.

पोलिस ठाण्यातील काही प्रमुख वैशिष्ट्ये
* ४० हून अधिक खोल्या आहेत, ज्यात स्वागत कक्ष, कर्मचारी विश्रांतीगृह, स्तनदा मातांसाठी स्वतंत्र कक्ष, आणि लॉकअप रूम यांचा समावेश
* सायबर आणि आर्थिक गुन्हे तपास कक्ष आणि तक्रारदार व अभ्यागतांसाठी स्वतंत्र व्यवस्था
* सौरऊर्जेवर चालणारे नवी मुंबईतील पहिले पोलिस ठाणे