तुला ही दानत, हे दातृत्व कळणारच नाही : खासदार नरेश म्हस्के

तुला ही दानत, हे दातृत्व कळणारच नाही : खासदार नरेश म्हस्के
सकाळ वृत्तसेवा
ठाणे, ता. २५ : कोल्हापूर, सांगली, चिपळूण, महाड, काश्मीर आणि बऱ्याच ठिकाणी उपमुख्यमंत्री एकनाथ शिंदे संकटकाळात मदतीसाठी धावून जात असतात. आपल्याजवळ आहे त्यातून ज्याला गरज आहे त्याला देत असतात. तुला ही दानत, हे दातृत्व कळणारच नाही संजय राऊत. कारण त्यासाठी ते अंगात असावं लागतं, अशी टीका शिवसेना शिंदे गटाचे खासदार नरेश म्हस्के यांनी केली. शिवसेना ठाकरे गटाचे खासदार संजय राऊत यांनी मदत साहित्याच्या पिशव्यांवर मुख्यमंत्री एकनाथ शिंदे आणि पक्षाचे चिन्ह छापल्याबद्दल टीका केली होती. यावर म्हस्के यांनी संजय राऊत यांच्यावर पलटवार केला.
मराठवाड्यातील बिकट परिस्थितीवर भाष्य करताना म्हस्के यांनी राऊत यांना टोला लगावला. शिंदे मराठवाड्यात गेले, यापूर्वीदेखील ते कोल्हापूर, सांगली, चिपळूण, महाड, काश्मीर आणि बऱ्याच ठिकाणी जात असतात. त्यांना सवय आहे, जे आपल्याजवळ आहे त्यातून ज्याला गरज आहे त्याला मदत करीत असतात. तुम्ही पण उद्या मराठवाड्यात जाणार आहात म्हणे. किमान पाच रुपयांचा बिस्किटाचा पुडा घेऊन जा बरं. फार बिकट अवस्था आहे तिथल्या बांधवांची. एरव्ही उन्हात जळणारा मराठवाडा आज पावसाने पुरता भिजून गेलाय. बघा जमतं का, पाच रुपयांचा बिस्किटाचा पुडा न्यायला. कारण तुमची दानत तेवढीच, असा टोलाही म्हस्के यांनी राऊत यांना लगावला.