पूरग्रस्तांसाठी पालिका अभियंत्यांनी दिले एक दिवसाचे वेतन

पूरग्रस्तांसाठी पालिका अभियंत्यांचे एक दिवसाचे वेतन
मुख्यमंत्री सहाय्यता निधीला मदत
सकाळ वृत्तसेवा
मुंबई, ता. २५ ः राज्यात निर्माण झालेल्या पूरस्थितीत बाधित झालेल्या शेतकऱ्यांना दिलासा देण्यासाठी महानगरपालिकेचे अभियंते एक दिवसाचे वेतन मुख्यमंत्री सहाय्यता निधीसाठी देणार आहेत. म्युनिसिपल इंजिनिअर्स असोसिएशनचे मुंबईचे अध्यक्ष टी. व्ही. शहा आणि कार्याध्यक्ष रमेश भुतेकर-देशमुख यांनी आयुक्त भूषण गगराणी यांना पत्राद्वारे कळविले आहे.
महाराष्ट्रामध्ये विशेषतः मराठवाडा विभागामध्ये मुसळधार पावसामुळे पूरपरिस्थिती उद्भवली आहे. विदर्भ, नाशिक, सोलापूरसारख्या भागामध्येदेखील पूरस्थिती निर्माण झाली आहे. अतिवृष्टीमुळे अनेक गावांचा संपर्क तुटला असून, नागरिकांची घरे पाण्याखाली गेली आहेत. हातातोंडाशी आलेल्या पिकांचे मोठ्या प्रमाणात नुकसान झाले असून, घरे, संसार, शेती सगळे काही डोळ्यासमोर वाहून गेले आहे. या पूरस्थितीमुळे अडचणीत सापडलेल्या पूरग्रस्त बांधवांच्या पाठीशी उभे राहण्याचा निर्णय महानगरपालिकेतील अभियंत्यांनी घेतला आहे. असे नमूद करून अभियंत्यांनी आजवर जपलेल्या सामाजिक बांधिलकीचा भाग म्हणून महानगरपालिकेतील अभियंते आपले एक दिवसाचे वेतन ‘मुख्यमंत्री सहाय्यता निधी’साठी देण्याची तयारी दर्शविली आहे. मुंबई महानगरपालिका अभियंत्यांचे चालू महिन्याच्या वेतनातून एक दिवसाच्या वेतनाची जमा झालेली रक्कम ‘मुख्यमंत्री सहाय्यता निधी’मध्ये वर्ग करण्याबाबत कार्यवाही करावी, अशी विनंती युनियनचे अध्यक्ष शहा आणि कार्याध्यक्ष भुतेकर, देशमुख यांनी या पत्रात आयुक्तांना केली आहे.