नवी मुंबई पोलीस आयुक्तालयाकडून २६.४८ कोटींचे अंमली पदार्थ नष्ट

नवी मुंबई पोलिसांकडून २६.४८ कोटी रुपयांचे अमली पदार्थ नष्ट
शास्त्रोक्त पद्धतीने लावली अमली पदार्थाची विल्हेवाट
नवी मुंबई, ता. २६ (वार्ताहर) : नवी मुंबई पोलिसांनी अमली पदार्थांच्या विरोधात सुरू असलेल्या ‘नशामुक्त नवी मुंबई’ अभियानांतर्गत मोठी कारवाई केली आहे. गेल्या दोन वर्षांत जप्त केलेले सुमारे २६.४८ कोटी रुपये किमतीचे अमली पदार्थ शुक्रवारी (ता. २६) तळोजा येथील मुंबई वेस्ट मॅनेजमेंट लिमिटेड कंपनीमध्ये शास्त्रीय पद्धतीने नष्ट करण्यात आले.
नष्ट करण्यात आलेल्या या साठ्यात एमडी, हेरॉईन, कोकेन, गांजा, चरस आणि एलएसडी पेपर्स यांसारख्या घातक अमली पदार्थांचा समावेश होता. या वेळी स्थानिक आमदार मंदा म्हात्रे यांच्यासह पोलिस आयुक्त संजय येनपुरे, अपर पोलिस आयुक्त दीपक साकोरे आणि पोलिस उपायुक्त (गुन्हे) सचिन गुंजाळ हे उपस्थित होते.
‘नशामुक्त नवी मुंबई’ या अभियानांतर्गत, २०२३ ते २०२५ या काळात पोलिसांनी एकूण १,८३१ गुन्हे दाखल केले असून, २,८५४ आरोपींना अटक केली आहे. जप्त करण्यात आलेल्या अमली पदार्थांचे एकूण मूल्य ७०.१८ कोटी रुपये आहे. अटक केलेल्या आरोपींमध्ये १०१ आफ्रिकन नागरिकांचा समावेश असून, त्यांच्याकडून अंदाजे ४० कोटी रुपयांचे अमली पदार्थ जप्त करण्यात आले आहेत. यापूर्वी, फेब्रुवारीमध्ये पहिल्या टप्प्यात ११.६१ कोटी रुपयांचे अमली पदार्थ नष्ट करण्यात आले होते.