महाबोधी महाविहार मुक्तीसाठी 14 ऑक्टोबरला मोर्चा

महाबोधी महाविहार मुक्तीसाठी १४ ऑक्टोबरला मोर्चा
सकाळ वृत्तसेवा
मुंबई, ता. ३० ः बोधगया येथील महाबोधी महाविहार हे बौद्धांचे जागतिक श्रद्धास्थान असून, ते आजही बौद्धांच्या  ताब्यात नाही. महाबोधी महाविहार व्यवस्थापन ट्रस्ट हे पूर्णपणे बौद्धांकडे असावे, यासाठी बिहार विधानसभेचा १९४९चा बीटी ॲक्ट रद्द करावा, या मागणीसाठी १४ ऑक्टोबर रोजी सकाळी ११ वाजता भायखळा येथील जिजामाता भोसले उद्यान ते आझाद मैदान असा मोर्चा काढण्यात येणार आहे.
बोधगया महाबोधी महाविहार मुक्ती आंदोलनाच्‍या वतीने झालेल्या पत्रकार परिषदेत मोर्चाबाबत माहिती देण्यात आली. रिपब्लिकन पक्षाचे राष्ट्रीय सरचिटणीस माजी राज्यमंत्री अविनाश महातेकर,  ज्येष्ठ साहित्यिक नेते अर्जुन डांगळे,  रिपब्लिकन नेते नाना इंदिसे,  रिपब्लिकन बहुजन नेते प्रा. सुरेश माने, ज्येष्ठ नेते तानसेन ननावरे, युथ रिपब्लिकनचे  सागर संसारे, रिपब्लिकन खोब्रागडे गटाचे नेते सुनीलभाऊ निरभवने, दलित पँथरचे सुरेश केदारे, शिवसेनेचे राजू वाघमारे, रवी गरुड, बाळराजे शेळके, राकेश मोहिते आदी या वेळी उपस्थित होते.
--------------