समाजप्रबोधनासाठी दिले हक्काचे घर

समाजप्रबोधनासाठी दिले हक्काचे घर
सुधागड तालुक्यातील झोरे कुटुंबीयांच्या दातृत्वाचे कौतुक
पाली, ता. २८ (वार्ताहर) ः सध्याच्या युगात प्रत्येक गोष्टीला किंमत आहे. एखादी वीटसुद्धा कोणी कोणाला फुकट देत नाही; मात्र अशा परिस्थितीत सुधागड तालुक्यातील खेमवाडी येथील खताळ कुटुंबीयांच्या वारसांनी पूर्वजांचे राहते घर दान केले आहे. त्याच्या या निर्णयामुळे धार्मिक, शैक्षणिक, सामाजिक तसेच प्रबोधनात्मक उपक्रमांसाठी ग्रामस्थांना हक्काची जागा मिळाली आहे.
सुधागड तालुक्यातील खेमवाडी-ताडगावाला स्वतःचे समाजमंदिर नव्हते. सध्या असलेली जागा गावाच्या मानाने खूप लहान होती. त्यामुळे गावात काही कार्यक्रम किवा लोकांना एकत्र येण्यासाठी हक्काची जागा नव्हती. गावालगतच्या परिसरात बाहेरील लोकांनी जागा विकत घेऊन कुंपण टाकून फार्महाउस तयार केले आहेत. त्यामुळे गावातील तरुण मुलांना नवरात्रोत्सव, पूजा तसेच सार्वजनिक कार्यक्रम बैठकांसाठी कसरत करावी लागत होती. त्यामुळे गावच्या मध्यभागी असणारे खताळ यांचे राहते समाजकार्यासाठी मंडळाला द्यावे, अशी विनंती खेमवाडी नवतरुण मित्र मंडळाच्या पदाधिकाऱ्यांनी वारसांना केली. त्यानुसार सुरेश झोरे, आकाश झोरे, अविनाश झोरे, अक्षय झोरे, आदित्य झोरे यांनी त्यांच्या मालकी हक्काचे घर निःस्वार्थपणे खेमजाई नवतरुण मित्र मंडळ, खेमवाडी सार्वजनिक मंडळाला बक्षीसपत्राद्वारे दान केले. त्यांच्या योगदानाचे सर्व स्तरातून कौतुक होत आहे.
------------------------------------------
स्वार्थी जगात कोणी पाणीसुद्धा फुकट देत नाही; परंतु अशाप्रकारे पूर्वजांचे घर समाजसेवेसाठी देणे खरोखरच अनोखी गोष्ट आहे. समाजातील तरुणांनी या गोष्टींचा आदर्श घेऊन काम केले पाहिजे.
- बाळासाहेब धायगुडे, खजिनदार, खेमजाई नवतरुण मित्र मंडळ