आशेळे गावात मुख्यमंत्री रोजगारनिर्मिती कार्यक्रमाविषयी मार्गदर्शन

आशेळे गावात मुख्यमंत्री रोजगारनिर्मिती कार्यक्रमाविषयी मार्गदर्शन
कल्याण, ता. २७ ः आशेळे गावात राज्य सरकारच्या जिल्हा उद्योग केंद्राच्या वतीने मुख्यमंत्री रोजगारनिर्मिती कार्यक्रमाबाबत मार्गदर्शन शिबिर आयोजित करण्यात आले. यामध्ये ग्रामस्थांना या महत्त्वाकांक्षी उपक्रमाबाबत माहिती देण्यात आली. तसेच फॉर्म भरण्यासाठी आवाहन करण्यात आले. कार्यक्रमात सहभागी झालेल्या नागरिकांनी उत्स्फूर्त प्रतिसाद दाखविला. मुख्यमंत्री रोजगारनिर्मिती कार्यक्रमांतर्गत युवक-युवतींना स्वयंरोजगाराच्या संधी देऊन उद्योजकता वाढविण्यासाठी आर्थिक सहाय्य दिले जाते. याअंतर्गत १० लाख ते ५० लाख रुपयांच्या प्रकल्पांसाठी कर्ज व अनुदान मिळू शकते. उत्पादन, प्रक्रिया उद्योगांसाठी तसेच सेवा व कृषिपूरक उद्योगांसाठी ५० लाख रुपयांची मर्यादा आहे. अनुदानाचा लाभ सामान्य वर्गाला शहरी भागात १५ टक्के आणि ग्रामीण भागात २५ टक्के तर अनुसूचित जाती-जमाती, महिला, दिव्यांग व भूतपूर्व सैनिकांना शहरी भागात २५ टक्के आणि ग्रामीण भागात ३५ टक्क्यांपर्यंत मिळतो. अर्जदार किमान १८ वर्षांचा आणि आठवी परीक्षा उत्तीर्ण असावा. तसेच महाराष्ट्राचा रहिवासी असणे आवश्यक आहे.
युवकांनी या कार्यक्रमाचा लाभ घेऊन स्वावलंबी होण्याचा मार्ग स्वीकारावा, असे मार्गदर्शन शिबिरात देण्यात आले.