ऐन नवरात्रोत्सवात विक्रेत्यांना पावसाचा फटका

ऐन नवरात्रोत्सवात विक्रेत्यांना पावसाचा फटका
पोयनाड, ता. २७ (बातमीदार) ः सध्या शारदीय नवरात्रोत्सव सुरू आहे. या नवरात्रोत्सवात शुक्रवार (ता. २६)पासून पावसाने पुन्हा हजेरी लावली आहे. या पावसाचा फटका पोयनाड बाजारपेठेतील छोट्या वस्तूंचे विक्रेते आणि व्यापाऱ्यांना बसला आहे.
नवरात्रोत्सवाच्या पहिल्या पाच दिवसांत विश्रांती घेतलेल्या पावसाने शनिवार (ता. २७) मात्र पोयनाड परिसरात जोरदार हजेरी लावली. पोयनाड बाजारपेठेत छोट्या वस्तू म्हणजे हार, नारळ, फुले, फळे, ओटीचे साहित्य विक्रीसाठी बसणाऱ्या व्यापाऱ्यांना पावसाचा मोठा फटका बसला. पाऊस पडल्याने सर्वत्र चिखलाचे साम्राज्य पसरले होते. दरम्यान, नवरात्र सुरू असल्याने विविध ठिकाणी उत्साहाचे वातावरण आहे; पण अचानक आलेल्या पावसाने गरबा नृत्य, दांडिया खेळणाऱ्यांची निराशा केली.