पावसाने रस्त्यांची पुन्हा चाळण

पावसाने रस्त्यांची पुन्हा चाळण
जुईनगर, ता. २७ (बातमीदार) : नवी मुंबईत शनिवारी (ता. २७) जोरदार सरी बरसल्या आहेत. या पावसामुळे शहरातील अनेक ठिकाणच्या रस्त्यांची पुन्हा चाळण झालेली पाहायला मिळाली.
सानपाडा, जुईनगर, नेरुळ आणि सीवूड परिसरात रस्त्यावर पडलेल्या खड्ड्यांमध्ये अधिकची भर पडली आहे. पाऊस थांबताच महापालिकेने बुजवलेल्या खड्ड्यांनी देखील पुन्हा डोके वर काढले आहे. तर, आणखी नवीन ठिकाणी खड्डे पडले. सानपाडा आणि नेरुळ परिसरातील अनेक गतिरोधक अर्धे तुटून गेले आहेत.
काही रस्त्यांवरील खड्यांची खोली अधिक वाढल्याने वाहन चालकांची डोकेदुखी आणखी वाढली आहे. अनेक ठिकाणी कॉंक्रिटीकरण आणि डांबरी रस्त्यांच्या मधील जोडणीत लांबलचक दरी पडली आहेत.
मागील तीन दिवस नवी मुंबईत पावसाने विश्रांती घेतली होती. मात्र, महापालिकेने खड्डे न बुजवल्याने रस्त्यांची दुरावस्था अधिक झाल्याचा आरोप नागरिक करत आहेत. तर पालिकेने पावसाचा जोर थांबताच खड्डे बुजवण्याचे काम हाती घेण्याची मागणी केली आहे. त्यामुळे पालिका प्रशासन हे पडलेले खड्डे बुजवण्यातबाबत येत्या दिवसात काय भूमिका घेते याकडे नागरिकांचे लक्ष लागले आहे.