मुख्याध्यापकाचे सहावर्षीय बालिकेशी अश्लील चाळे

मुख्याध्यापकाचे सहावर्षीय
बालिकेशी अश्लील चाळे

डोंबिवलीजवळ शाळेतील घटना; आराेपी अटकेत

सकाळ वृत्तसेवा
डोंबिवली, ता. २७ : शहराजवळ एका जिल्हा परिषदेच्या शाळेच्या प्रभारी मुख्याध्यापकाने पहिलीत शिकणाऱ्या सहावर्षीय चिमुरडीसोबत अश्लील चाळे केल्याची धक्कादायक घटना उघड झाली आहे. ग्रामस्थांनी या शिक्षकाला चोप देऊन पोलिसांच्या स्वाधीन केले. महेंद्र खैरनार (वय ४७) असे त्याचे नाव असून, मानपाडा पोलिसांनी त्याला अटक केली आहे.
पहिली ते सातवीपर्यंत ही शाळा असून, यात तीन शिक्षक आणि दाेन शिक्षिका आहेत. शाळेचा प्रभारी मुख्याध्यापक खैरनार याने पहिलीतील एका मुलीशी अश्लील वर्तन केले. तिला त्रास होऊ लागल्याने तिने हा प्रकार तिच्या आईला सांगितल्यानंतर ही घटना उघडकीस आली. पालकांनी ही बाब शालेय व्यवस्थापन समितीचे सदस्य तथा शिवसेना उद्धव बाळासाहेब ठाकरे पक्षाचे उप तालुकाप्रमुख ॲड. मुकेश भोईर यांच्या कानावर घातली. त्यांनी याची गंभीर दखल घेऊन ग्रामस्थांच्या मदतीने महेंद्र याला चोप दिला आणि मानपाडा पोलिस ठाण्याच्या स्वाधीन केले.
मानपाडा पोलिस ठाण्याचे वरिष्ठ पोलिस निरीक्षक संदीपान शिंदे यांच्या मार्गदर्शनाखाली तपास करून शिक्षकाविरोधात पोक्सोअंतर्गत गुन्हा दाखल करीत त्याला अटक केली.

सहाय्यक पोलिस आयुक्त सुरेश हेमाडे यांनी या वृत्ताला दुजोरा दिला असून, मुख्याध्यापक महेंद्रविरोधात गुन्हा दाखल करून त्याला अटक केल्याचे त्यांनी सांगितले.