शाळेची कमान पडुन एका कामगाराचा मृत्यू

बांधकामाधीन शाळेची कमान कोसळून एका कामगाराचा मृत्यू
नवी मुंबई, ता. २७ (वार्ताहर) : उलवे येथे शुक्रवारी (ता. २६) सकाळी एस. बी. चॅरिटेबल स्कूलच्या प्रवेशद्वाराजवळील कमानीचे बांधकाम सुरू असताना कमान कोसळल्याने झालेल्या दुर्घटनेत कमलाकर बालाजी कदम (वय ४२) या कामगाराचा जागीच मृत्यू झाला. या अपघातात चंदू देवराव धोत्रे (वय २५) आणि केशव भगवान हांबरे (वय २६) हे दोन कामगार गंभीर जखमी झाले आहेत.
कमानीच्या सिमेंट काँक्रीट भरावाचे काम सुरू असताना कमान खाली काम करणाऱ्या कामगारांवर कोसळली. पोलिसांच्या तपासणीत बांधकामस्थळी कामगारांना सुरक्षिततेच्या दृष्टीने आवश्यक साधने आणि सुविधा पुरवल्या नसल्याचे उघड झाले. त्यामुळे ही दुर्घटना निष्काळजीमुळे घडल्याचे आढळले आहे.
या दुर्घटनेस जबाबदार धरून उलवे पोलिसांनी मनुष्यबळ पुरवणाऱ्या कंत्राटदार नवाज अल्लाउद्दीन शेख (वय ४२) आणि कंत्राटदार नामदेव बाबुराव दिघे यांच्याविरोधात निष्काळजीचा गुन्हा दाखल करून त्यांना अटक केली. नंतर दोघांनाही नोटीस देऊन सोडण्यात आले.