संततधार पावसाने वाहतूक मंदावली

संततधार पावसाने वाहतूक मंदावली
पोयनाड, ता. २८ (बातमीदार) ः परिसरात रविवारी दिवसभर संततधार पडणाऱ्या पावसामुळे पेण-अलिबाग राज्यमार्गावरील वाहतुकीचा वेग मंदावला होता. सुट्टीचा दिवस असल्याने मुंबई-पुणे येथून निघालेल्या पर्यटकांना पांडवादेवी ते पेझारीदरम्यान कोंडीचा फटका बसला.
पोयनाड बाजारपेठेत व्यापाऱ्यांची तारांबळ उडाली. ठिकठिकाणी पाणी साचण्याच्या घटना घडल्या. वडखळ-अलिबाग राज्यमार्गावरील खड्ड्यांमुळे वाहतुकीचा वेग मंदावला होता. त्याचा सर्वाधिक फटका एसटीने प्रवास करणाऱ्यांना बसला. जवळचे अंतर पार करण्यासाठी अर्धा ते पाऊण तासाचा वेळ लागत असल्याने स्थानिकांना मनस्ताप झाला. ठिकठिकाणी वाहतूक पोलिस, होमगार्ड तैनात करण्यात आले होते. मुंबई, पुण्याकडे जाण्यासाठी प्रवाशांनी मोठी गर्दी केली होती. पावसामुळे कोणतेही नुकसान अथवा जीवितहानी झाली नाही; पण जनजीवनावर विपरीत परिणाम दिसून आला.