विरारला मुसळधार पावसाचा फटका

विरार (बातमीदार) : रात्रीपासून सुरू असलेल्या मुसळधार पावसाचा जोरदार फटका विरार पूर्व भागातील जनकपूरधाम, गोविंदनगर तसेच सहकारनगरला बसला आहे. या परिसरातील रहिवाशांच्या घरात पावसाचे पाणी शिरल्याने सर्वांची धावपळ उडाली. अनेकांना नुकसान सोसावे लागले. यासंदर्भात रहिवाशांनी माजी स्थायी समिती सभापती तथा नगरसेवक सुदेश चौधरी यांच्याकडे तक्रारी केल्यानंतर त्यांनी तत्काळ पालिका अधिकाऱ्यांना पाचारण करून त्यांच्यासोबत परिस्थितीची पाहणी करून नुकसानीचा आढावा घेतला.

अतिमुसळधार पावसामुळे शहरातील विरार, नालासोपारा, तुळिंज, गालानगर, वसई रेल्वेस्थानक पूर्व आणि पश्चिम परिसर, बंगली नाका, १०० फुटी रस्ता, समतानगर, पंचवटी नाका, एव्हरशाईन परिसर, चुळणे, नायगाव येथील स्टार सिटी, डॉन बास्को नायगाव रस्ता, टिवरी रस्ता आदी भागांत पाणी साचले होते. शहरातील वाहतुकीवर परिणाम दिसून आला, तर महामार्गावर वर्सोवा ते विरारफाट्यादरम्यान पाणी साचून वाहतुकीचा वेग मंदावला होता.