अपात्र डी. फार्मसीच्या महाविद्यालयांची यादी सीईटी सेलच्या प्रवेशातून वगळणार

अपात्र डी. फार्मसी महाविद्यालयांची यादी सीईटी सेलच्या प्रवेशातून वगळणार

मुंबई, ता. २८ : फार्मसी कौन्सिल ऑफ इंडियाने (पीसीआय) राज्यातील ७१ पदव‍िका आणि १८ पदवीच्या फार्मसी (औषधनिर्माणशास्त्र) अभ्यासक्रमांच्या महाविद्यालयांमध्ये २०२५-२६ या शैक्षणिक वर्षात प्रवेशाला बंदी घातली आहे. यामध्ये बी. फार्मसी पदवीच्या १८ महाविद्यालयांना राज्य सीईटी सेलने अगोदरच प्रवेश प्रक्रियेत दूर ठेवले. पुढील दोन दिवसांत डी. फार्मसीच्या ७१ महाविद्यालयांची नावे सीईटी सेलकडून वगळली जाणार आहेत.

राज्यातील बी. फार्मसी (औषधनिर्माणशास्त्र) प्रवेशाचे वेळापत्रक नुकतेच जाहीर करण्यात आले आहे. तर डी. फार्मसीचे वेळापत्रक जाहीर होणे बाकी आहे. त्यापूर्वीच विद्यार्थ्यांना प्रवेशबंदी करण्यात आलेल्या महाविद्यालयांत प्रवेश घेता येणार नाही. यासाठी तंत्रशिक्षण संचालनालय आणि राज्य सीईटी सेलमार्फत समन्वय साधला जाणार आहे. प्रवेशबंदी घालण्यात आलेल्या डी. फार्मसी महाविद्यालयांमध्ये कोणतेही प्रवेश करता येणार नाहीत. यासाठी फार्मसी कौन्सिल ऑफ इंडियाने दिलेल्या आदेशाची काटेकोरपणे अंमलबजावणी केली जाणार असल्याने असल्याचे सांगण्यात आले. बंदी घालण्यात आलेली बहुतांश महाविद्यालये ही पीसीआयने दिलेल्या मानांकनाची पूर्तता करीत नाहीत.