गुगल मॅप ने फसवले,

गुगल मॅपने फसवले, रस्त्यावरील साचलेल्या पाण्यात अडकवले; अग्निशामक दलाकडून कारमध्ये अडकलेल्या प्रवाशांची सुखरूप सुटका
गुगल मॅपमुळे फसवणूक; दोन ओला कार पाण्यात अडकल्या, सात प्रवाशांची सुखरूप सुटका
भिवंडी, ता. २८ (वार्ताहर) : गुगल मॅप वापरण्याच्या नादात बापगाव-सोनाळे मार्गावर चुकीच्या रस्त्याने गेल्याने प्रवाशांना घेऊन निघालेल्या दोन ओला कार रस्त्यावर साचलेल्या पाण्यात अडकल्याची घटना भिवंडी येथे घडली आहे.
नाशिकहून मुंबईतील भांडुप येथे जाण्यासाठी निघालेल्या या दोन्ही गाड्यांना आमणे येथे गुगल मॅपने बापगाव-सोनाळे मार्गे रस्ता दाखवला. यानुसार प्रवासाला लागलेल्या या गाड्या मौजे लोनाड चौधरी पाडा येथील एपीएक्स कंपनीजवळील रस्त्यावर साचलेल्या पाण्यात अडकल्या. यामध्ये एक महिला, दोन पुरुष आणि दोन मुली असे पाच प्रवासी व दोन चालक, मिळून सात जण अडकून पडले होते.
जिल्हा आपत्कालीन कक्षाकडून माहिती मिळाल्यानंतर तहसीलदार अभिजित खोले यांच्या मार्गदर्शनाखाली पडघा मंडळ अधिकारी संतोष आगिवले आणि तलाठी चित्रा विशे यांनी तत्काळ भिवंडी अग्निशामक दलाच्या पथकासह घटनास्थळी धाव घेतली. बोटीच्या मदतीने कारमध्ये अडकलेल्या या सर्व सातही प्रवाशांना आणि चालकांना सुखरूप बाहेर काढून त्यांच्या कुटुंबीयांकडे पाठवण्यात आले, अशी माहिती तहसीलदार अभिजित खोले यांनी दिली आहे.