डोंबिवलीत सर्पदंशामुळे मुलीचा मृत्यू

डोंबिवलीत सर्पदंशामुळे मुलीचा मृत्यू
सकाळ वृत्तसेवा
डोंबिवली, ता. २८ ः डोंबिवलीजवळच्या खंबाळपाडा येथे सर्पदंशाने एका चार वर्षांच्या मुलीचा मृत्यू झाला आहे. शाळेला सुट्टी असल्याने ती आपल्या मावशीकडे राहायला गेली होती. तर सापाने चावा घेतल्याने मावशीही बाधित झाली आहे. तिच्यावर ठाण्याच्या सिव्हिल रुग्णालयात उपचार सुरू आहेत.
प्राणगी विकी भोईर असे मृत मुलीचे नाव असून ती आजदे गावातील भागीरथी अपार्टमेंटमध्ये राहत होती. ती शनिवार/रविवार सुट्टी असल्याने खंबाळपाड्यात राहणारी तिची मावशी बबली ऊर्फ श्रुती अनिल ठाकूर (वय २३)कडे राहायला गेली होती. प्राणगी रात्री मावशी हिच्याजवळ झोपली असताना विषारी सापाने तिला चावा घेतला. त्यानंतर मावशीलाही सापाने चावा घेतला. विष शरीरात भिनल्याने प्राणगीचा रुग्णालयात नेण्यापूर्वीच मृत्यू झाला. मावशी बबली ऊर्फ श्रुती हिची प्रकृती गंभीर झाल्याने तिला तातडीने ठाण्याच्या सिव्हिल रुग्णालयामध्ये अतिदक्षता विभागात दाखल करण्यात आले आहे. सूत्रांनुसार, सध्या तिची प्रकृती धोक्याबाहेर आहे.