मुलुंडमध्ये विवेक प्रेरणा अभ्यासिकेचा प्रारंभ

मुलुंडमध्ये विवेक प्रेरणा अभ्यासिकेचा प्रारंभ
मनोज कोटक यांच्या पुढाकाराने विनामूल्य मार्गदर्शन
घाटकोपर, ता. २९ (बातमीदार) ः माजी खासदार मनोज कोटक यांच्या मार्गदर्शनाखाली युवक प्रेरणा फाउंडेशन व प्रख्यात करिअर काउन्सेलर व्रज पटेल यांच्या महर्षी दयानंद फाउंडेशन आय.ए.एस. अकादमी यांच्या संयुक्त विद्यमाने ‘विवेक प्रेरणा अभ्यासिका’ स्थापन करण्यात आली आहे. या अभ्यासिकेचा प्रारंभ शुक्रवारी (ता. २६) मुलुंड पश्‍चिमेतील बीएमसी मार्केट इमारतीमध्ये झाला.
भाजपचे प्रदेशाध्यक्ष रवींद्र चव्हाण, निवृत्त आयएएस अधिकारी, चाणक्य मंडळ परिवाराचे संस्थापक अविनाश धर्माधिकारी यांच्या हस्ते उद्‌घाटन झाले. याप्रसंगी आमदार मिहीर कोटेचा, टी वॉर्डच्या सहाय्यक आयुक्त योगिता कोल्हे, विविध क्षेत्रांतील पदाधिकारी उपस्थित होते.
अभ्यासिकेत दहा हजारांहून अधिक पुस्तकांचा संग्रह असून आय.क्यू. व अभिक्षमता चाचणी, करिअर कौन्सिलिंग आणि स्पर्धा परीक्षांसाठी मार्गदर्शन विनामूल्य उपलब्ध आहे. स्‍पर्धा परीक्षांसाठी पुस्‍तके, मार्गदर्शन विद्यार्थ्यांना मिळणार आहेत. शिक्षणाच्या व्यापारीकरणामुळे अनेकांची स्वप्ने अपूर्ण राहतात; पण ही अभ्यासिका मध्यमवर्गीय विद्यार्थ्यांसाठी संधीचे दार उघडेल, असे मनोज कोटक यांनी सांगितले.