उल्हास नदीत वाहून गेलेला तरूण अद्याप बेपत्ता

उल्हास नदीत वाहून गेलेला तरुण अद्याप बेपत्ता
बदलापूर, ता. २९ (बातमीदार) : अंबरनाथ येथील चिंचपाडा परिसरात राहणाऱ्या मोहम्मद शेख (वय २१) या तरुण शनिवारी (ता. २७) दुपारी बदलापूरमधून उल्हास नदीत वाहून गेला. तरुणाच्या भावांनी रात्री नऊ वाजण्याच्या सुमारास बदलापूर पश्चिम पोलिस ठाण्यात मोहम्मद शेख वाहून गेल्याची तक्रार केली.
अंबरनाथ येथे राहणारा मोहम्मद हा इतर दोन भावांसोबत बॅरेज रोड परिसरातून वाहणाऱ्या उल्हास नदीच्या पात्रात मासेमारी करण्यासाठी आला होता. दोन दिवसांपासून पडत असलेल्या मुसळधार पावसामुळे नदीच्या पाणीपातळीत कमालीची वाढ झाली होती. पाण्याचा अंदाज न आल्याने मोहम्मद नदीत वाहून गेला. दरम्यान, दुपारी तीनच्या दरम्यान ही घटना घडली; मात्र रात्री उशिरा नऊ वाजता मोहम्मदच्या भावांनी बदलापूर पश्चिम पोलिस ठाण्यात तो वाहून गेल्याची तक्रार नोंद केली. रात्री पावसाचा जोर अधिक आणि अंधाराची वेळ असल्याने अग्निशमन दलाला मोहम्मदचा शोध घेणे शक्य झाले नाही. मोहम्मदचा शोध घेणे अवघड जात असल्याने अद्याप त्याचा शोध लागला नसल्याचे अग्निशमन दलाचे अधिकारी दामोदर वांगड यांनी सांगितले.