अंबरनाथ नगरपालिकेत माहिती अधिकारी दिन साजरा

अंबरनाथ, ता. २९ (वार्ताहर) : अंबरनाथ नगरपालिकेमध्ये सोमवारी (ता. २९) माहिती अधिकारी दिन अत्यंत उत्साहात साजरा करण्यात आला. माहिती अधिकार कायद्याचे महत्त्व आणि लोकशाही बळकट करण्यात त्याचे योगदान यावर या कार्यक्रमात भर देण्यात आला. ​याप्रसंगी नगरपालिकेचे अधिकारी, कर्मचारी तसेच नागरिक मोठ्या संख्येने उपस्थित होते.
कार्यक्रमात माहिती अधिकार कायद्याचे महत्त्व, पारदर्शक व जबाबदार प्रशासन घडविण्यात त्याचे योगदान तसेच नागरिकांच्या हक्कांची जाणीव या विषयांवर मार्गदर्शन करण्यात आले. ​यावेळी उपमुख्याधिकारी उमेश राऊत, लेखाधिकारी प्रवीण वडगये, लेखापरीक्षण अधिकारी किरण तांबारे आणि शहर अभियंता संजय कुंभार यांनी मत व्यक्त केले. माहिती अधिकार कायद्यामुळे सरकारमधील पारदर्शकता आणि जबाबदारी वाढल्याचे त्यांनी सांगितले. तसेच, नागरिकांना माहितीचा हक्क मिळाल्यामुळे देशातील लोकशाही अधिक सक्षम झाल्याचा त्यांनी पुनरुच्चार केला. शेवटी उपस्थित मान्यवरांच्या हस्ते उत्कृष्ट कार्य करणाऱ्या माहिती सहाय्यकांचा गौरव करण्यात आला. या कार्यक्रमास काही माजी नगरसेवक, विविध विभागांचे प्रमुख, कर्मचारी व नागरिक मोठ्या संख्येने उपस्थित होते.