फेमस स्टुडिओ आता काळाच्या पडद्याआड

फेमस स्टुडिओ जाणार काळाच्या पडद्याआड

मुंबई, ता. ३० ः महालक्ष्मी परिसरातील फेमस स्टुडिओ मागील जवळपास ८० वर्षांपासून चित्रपट निर्मिती, मिनी थिएटर, शूटिंग, साउंड रेकॉर्डिंग आणि मिक्सिंगसाठी ओळखला जात होता. आता हा स्टुडिओ काळाच्या पडद्याआड जाणार असून, त्या जागी भव्य निवासी प्रकल्प उभारण्यात येणार आहे.
चेतन आनंद, देव आनंद आणि विजय आनंद या आनंद बंधूंच्या नवकेतन फिल्म्सचे कार्यालय अनेक वर्षे या स्टुडिओत होते. याशिवाय विविध रिॲलिटी शोचे मोठ्या प्रमाणावर चित्रीकरणदेखील येथे झाले आहे. एका माहितीनुसार, सुमारे ७०,००० चौरस फूट जागेवर ६९ मजली लक्झरी टॉवर उभारला जाणार आहे. या स्टुडिओने हिंदी चित्रपट, संगीत रेकॉर्डिंग आणि प्रयोगांचा जवळपास ८० वर्षांचा समृद्ध इतिहास जपला आहे. भारतीय सिनेमातील अनेक संस्मरणीय क्षणांचा साक्षीदार असलेले हे आयकॉनिक ठिकाण आता फक्त आठवणी आणि अभिलेखांमध्ये जतन केले जाईल. बदलत्या मुंबईच्या आकाशरेषेत महालक्ष्मीचे हे ठिकाण नव्या रूपात दिसणार असले तरी फेमस स्टुडिओशी जोडलेल्या आठवणी प्रेक्षकांच्या मनात कायम जिवंत राहतील.