उंबर्डे गावात सापडली सापाची दहा पिल्ले

उंबर्डे गावात सापडली सापाची दहा पिल्ले
सर्पमित्रांनी सुरक्षित ठिकाणी सोडले

कल्याण, ता. १ (बातमीदार) ः पश्चिमेकडील उंबर्डे परिसरात कालिदास कारभारी यांना जनावरांच्या बेड्यामध्ये सापांच्या हालचाली जाणवल्या. त्यानंतर त्यांनी त्वरित सर्पमित्र दत्ता बोंबे यांच्याशी संपर्क साधला. सर्पमित्रांनी शोध घेतल्यावर धामण या बिनविषारी सापाची दहा पिल्ले आढळून आली. दत्ता बोंबे यांनी सर्व पिल्लांना काळजीपूर्वक छिद्र पाडलेल्या प्लॅस्टिक बरणीत कैद करून सुरक्षित अधिवासात सोडले.

कल्याण-डोंबिवली शहरात वाढत्या बांधकामांमुळे वन्यप्राण्यांचा अधिवास कमी होत आहे. त्यामुळे नाग, घोणस, मण्यारसह अजस्र अजगर आणि धामण यांसारखे साप शहरी भागातही दिसून येत आहेत. यामुळे शहरवासीय आश्चर्य व्यक्त करीत आहेत. साप दिसल्यास त्याला मारू नका, घाबरूनही जाऊ नका, तर सर्पमित्र, वनविभाग किंवा अग्निशमन दलाशी संपर्क साधावा, असे आवाहन सर्पमित्रांकडून करण्यात आले आहे.

याआधीही ‘सकाळ’ने शहरात विषारी सापांच्या वाढत्या वावराची सूचना दिली होती. तिसगाव नाका परिसरातून विषारी नाग रेस्क्यू केला गेला होता, तर डोंबिवलीत विषारी सापाच्या चाव्यामुळे दोन जणांचा दुर्दैवी मृत्यूही झाला. नागरिकांनी पाणथळ आणि गवताळ भागातून चालताना विशेष दक्षता घेण्याची गरज आहे. प्रशासनानेही सर्पदशांवर तातडीने उपचाराची व्यवस्था करणे अत्यंत आवश्यक आहे.