मोबाईल चोरीतील आंतराष्ट्रीय टोळीला अटक

मोबाईल चोरीतील आंतरराष्ट्रीय टोळीला अटक
चुनाभट्टी पोलिसांची कारवाई
चेंबूर, ता. १ (बातमीदार) ः मुंबईतून महागडे मोबाईल चोरी करणाऱ्या आंतरराष्ट्रीय टोळीला चुनाभट्टी पोलिसांनी अटक केली. त्याच्याकडील १८३ महागडे मोबाईल हस्तगत करण्यात आले आहेत.
सचिन गायकवाड, तौसीब सिद्धीकी, अमर शंकर, निसार हुसेन आलम, सादिक शेख, मुरशीद मन्सूर सिद्धीकी, प्रदीप गुप्तता, अझीझुर रेहमान असे अटक करण्यात आलेल्या आरोपीची नावे आहेत. चुनाभट्टी पोलिस ठाणे हद्दीतील बेस्ट बसथांब्यावर मंगळवारी (ता. ३०) फिर्यादी उभा असताना अचानक त्याचा ३५ हजार किमतीचा आयफोन मोबाईल चोरण्यात आला. फिर्यादीने तातडीने चुनाभट्टी पोलिस ठाण्यात जाऊन तक्रार नोंदविली असता पोलिसांनी गुन्हा नोंद करून घेतला होता. पोलिस उपआयुक्त परिमंडळ सहाच्या मार्गदर्शनाखाली विशेष पथकाची नेमणूक करण्यात आली होती. पथकाने तांत्रिक व गुप्त बातमीदार यांचा कौशल्यपूर्ण वापर करून आठ आरोपींना मुंबई व नवी मुंबईतून अटक केली असून त्यांच्याकडून एकूण ३०,४८,०१० रुपये किमतीचे १८३ मोबाईल हस्तगत करण्यात आले आहेत. तपासात आणखी सहा आरोपी निष्पन्न झाले आहेत. त्यात काही बांगलादेशींचा समावेश आहे. लवकरात लवकर आरोपींना अटक करण्यात येईल, असे पोलिसांनी सांगितले. गुन्ह्याचा पुढील तपास सहाय्यक पोलिस निरीक्षक राजकुमार पोवार करीत आहेत.