गोपीचंद पडळकरांना बदलापुरात राष्ट्रवादीचा इशारा

बदलापूर, ता. १ (बातमीदार) : भाजप आमदार गोपीचंद पडळकर यांनी राष्ट्रवादी काँग्रेसचे नेते जयंत पाटील यांच्याबद्दल केलेल्या वादग्रस्त वक्तव्यानंतर बदलापुरातील राष्ट्रवादी शरद पवार गट खूपच आक्रमक झाला आहे.
पडळकरांनी मंगळवारी पुन्हा एकदा जयंत पाटील यांच्याबद्दल टीका केली. त्यानंतर बदलापुरातील राष्ट्रवादी काँग्रेसचे पदाधिकारी नाराज झाले आहेत. त्यांनी पडळकर यांच्या वक्तव्याचा खरपूस समाचार घेतल्याचे सांगितले. राष्ट्रवादी काँग्रेसचे प्रदेश सरचिटणीस अविनाश देशमुख यांनी थेट इशारा देत म्हटले, गोपीचंद पडळकरांनी ठाणे जिल्ह्यात येऊन दाखवावे; आम्ही त्यांच्या गाडीसह त्यांच्या तोंडाला काळे फासू. या वक्तव्यामुळे बदलापुरातील राजकीय वातावरण तणावपूर्ण झाले असून, आगामी काळात दोन्ही पक्षांमध्ये राजकीय संघर्ष अधिक तीव्र होण्याची शक्यता आहे.